Fraccion di PPA ta propone aumento di 6.5 miyon pa gastonan di personal den Cuerpo Policial

Fraccion di PPA den Parlamento a propone un aumento di 6.5 miyon pa gastonan di personal den Cuerpo Policial pa asina cuminsa reduci e deficit di 52% den falta di personal pa KPA. Ta pagando awendia 12 miyon Florin na overtime mientras cu por a emplea 200 agente adicional pa e mesun suma aki y sigui habri klasnan regularmente pa recluta mas personal pa e cuerpo durante eproximo añanan.
Banda di esaki, Oduber a menciona cu den e amienda ta pone 5.5 miyon Florin adicional pa Cuerpo Policial pa asina por sigura ekiponan necesario, manera entre otro “bodycams” y “dashcams” pa por funciona den forma optimo, garantizando ambos e seguridad di e agente policial como tambe e ciudadano.
Parlamento a bay unanimamente di acuerdo cu e mocion pa duna placa y instrumentonan na Cuerpo Policial pa nan por funciona. Otmar Oduber den su discurso den Parlamento a bisa cu e kier wak si miembronan di Parlamento ta pone echo tras di nan palabra y vota na fabor di e amienda aki, permitiendo asina pa por ekipa Cuerpo Policial cu hende y instrumentonan necesario.
Den sala di Parlamento mes, hefe di Cuerpo Policial a indica cu nan ta 52% onderbezet y ta puntra su mes ta con kier pa e agente policial funciona, inclusive ta papia di 300 pa 400 polis riba caya cu no tin y ta inhumano pa pone esnan laborando traha asina hopi overtime, yegando manera menciona ariba, na 12 miyon Florin siendo cu e suma aki lo por a emplea 200 agente policial adicional.