ORANJESTAD – Diahuebs anochi Prome Minister Evelyn Wever-Croes tabata presente na Double Down Sports Bar and Grill pa e apertura di e Weganan Interinsular na Aruba. Presente tabata Minister di Enseñansa, Ciencia, Cultura y Deporte di Corsou Sithree van Heydoorn. Director di IBISA Isnaro Faro, representante di FDDK Corsou y Idebon di Bonaire.
Den su discurso, Prome Minister a indica cu 3 aña pasa ex Minister di Deporte Endy Croes a informa conseho di minister, cu el a logra pa Aruba bolbe cuminsa cu weganan interinsular. Na October 2022 Ministernan di Deporte di Aruba y Corsou tabata na Bonaire pa celebracion di 40 aña di Indebon y na e oportunidad aki hunto cu Diputado James Kroon a firma e acuerdo pa re-inicia cu Weganan Interinsular entre e 3 islanan. Na 2023 cu e acuerdo aki firma a inicia e Weganan Interinsular cu tabata un exito total mesora
Prome Minister a indica cu mirando cu Aruba lo tin un Gobierno nobo na caminda, a pidi den e documentonan laga atras pa nan sigui cu e compromiso aki na bienestar di nos hobennan y muchanan.
Pa Gabinete Wever-Croes deporte semper tabata un prioridad, mirando e importancia cu esaki tin pa desaroyo di nos hobennan.. Weganan iinterinsular no solamente ta contribui na e aspecto fisico di practica deporte sino tambe pa e muchanan cera un amistad cu otro, estrechando asina lasonan di hermandad entre e islanan ruman.
Tambe Prome Minister a referi na e 4 Dnan cu ex Minister Endy Croes semper tabata papia di dj’e. E prome ta Deseo cu cada hoben of mucha mester tin pa practica e deporte, di dos ta Disciplina paso si no tin disciplina nan no lo logra yega leu den e deporte, di 3 ta Dedicacion na e trainingnan, y di 4 ta Determinacion, cu ni con dificil ta semper sigui haci e esfuerso pa logra. Si cada hoben/mucha sigui e 4Dnan aki, sigur nan lo ta exitoso den tur loke nan propone nan mes.
Na final di e anochi representantenan di Corsou y Bonaire a entrega Prome Minister un reconocemento como gratitud pa e esfuerso y dedicacion cu su Gobierno tabata tin pa Deporte. Tambe a yama Sandra Suarez dilanti cu ta ruman di ex Minister Endy Croes pa asina nan por a entregu’e e reconocemento pa ex Minister Endy Croes. Sigur un reconocemento bon mereci mirando cu si no ta pa e amor y pasion grandi cu ex Minister Endy Croes tin pa deporte nada di esaki lo tabata posibel.
Despues di entrega di reconocemento, a clausura e anochi cu e grupo di baile Dazzling Dancers cu a haci un tremendo presentacion pa despues oficialmente inicia cu e weganan interinsular.
Prome Minister ta gradici na prome luga exx Minister Endy Croes pa tur su esfuerso y dedicacion pa cu deporte durante e añanan cu e la sirbi pais Aruba bou Gabinete Wever-Croes. Tambe un danki na IBISA, e delegacion di Corsou (FDDK), y e delegacion di Bonaire (Idebon) na haci esaki posibel. Por ultimo Prome Minister ta desea tur e hobennan/muchanan deportista hopi exito durante e competencianan, y ta gradici cada un di nan, paso sin nan e weganan aki no lo ta posibel.
