ORANJESTAD – Prome Minister Evelyn Wever-Croes a extende un invitacion na e ministernan di e Gabinete nobo AVP-FUTURO, pa pasa Cocolishi / Bestuurskantoor diabierna mainta prome cu e huramentacion official tuma luga, pa asina e por cumpli cu su deseo di haci un traspaso responsabel.
E mainta aki tur e ministernan nobo y esnan saliente a reuni den sala di conseho di minister pa asina por pasa riba algun punto importante pa despues cada minister haci nan traspaso oficial.
Prome Minister den su entrevista cu prensa a indica cu gobernacion ta continuacion, y cu despues di a goberna pais Aruba pa 7 aña y mei, ta importante pa haci un traspaso debido pa tur e esfuersonan haci no bay perdi.
Pa cu esaki, Prome Minister a reuni cu señor Mike Eman ken lo ta e siguiente Prome Minister di pais Aruba, den e oficina cu el a ocupa durante e ultimo añanan pa asina pasa riba tur e puntonan mas crucial. Tambe ambos a indica cu lo bay mantene un liña habri pa den casonan cu mester, lo por tiin contacto cu otro.
“Manera mi a bisa, e transicion pami ta di suma importancia paso si esey no bay bon, nada cu mi a haci ta bon. Aworaki tur cos ta documenta y cu e portanan habri” Prome Minister a expresa.
