ORANJESTAD (27 di maart 2025) – Esaki t’e; diadomingo awo ta di Fiesta Rotaria 2025. Un di e eventonan mas grandi riba e isla ta cla, un biaha mas, pa ofrece un y tur entretenimento, cuminda y co’i bebe, hopi articulo excelente na benta, mientras cu na mesun momento ta recauda e fondonan cu lo destina na yuda nos comunidad.
Durante e fin di siman aki, e parkinglot di Stadion Guillermo Prospero Trinidad na Dakota lo transformapa asina por organisa cada area su suficiente espacio pa tur bishitante por disfruta di e presentacionnan di Pierewietje y Club di Movimiento, Kibrahacha 60+ y Stephanie Quant, kendenan lo trece e ritmo di tradicion y talento local.
Durante e dia, DJnan di Megateca Genie lo mantene e ambiente electrico, y atardi ta reserva pa e energia contagioso di e muchanan di Rincon Boyz y nan dushi repertorio. Lenny Denz y Cherryldine Buckley ta figuranan cu lo guia nos durante e programacion di e dia completo, cu hopi energia y pasion.
Pero e fiesta no ta completo sin hopi cuminda dushi! Cuminsa bo dia cu un desayuno sabroso di koffie, te, juice y pastries for di Island Grind. Tambe lo tin pastechi y kroket na cada ken su gusto. Y na ora di lunch, bo por scoge entre saté di galiña cu cole slaw, y fried rice, of BBQ spareribs cu aros y corn on the cob, tur na un prijs accesibel. Bar tambe lo ta bon surti y un tent grandi cu stoel y mesa ta garantisa comodidad y un ambiente fresco pa disfruta di e dia.
Pa e muchanan, Fiesta Rotaria tin un ‘Kids Corner’ special cu dino jump, hopi wega popular, y treats manera popcorn, hotdog, nachos, ice cream, y cotton candy. Hopi diversion pa mantene e muchanan contento, mientras cu e grandinan ta cana, wak, cumpra y combersa.
Si bo ta busca algo special, por adelanta cu e area di vlooienmarkt lo tin standdi hardware y homeware. Aki lo tin oferta increibel cu hopi articulo pa cas, oficina of apartamento. Pa loke ta mata, lo tin mas cu 200 tipo diferente, incluyendo di fruta.Lo tin un secion special pa paña pa mucha, hende homber y hende muher. Sin lubida nos secion di supermercado, cu prijs nan special.
Ademas, te cu 5’or di atardi bo tin chens di cumpra bo rifa pa e KIA Seltos 2025 completamente nobo! Esey ta djis un di 19 premio cu tin pa reparti. Y si bo no ta presente, no ta ningun problema; nos lo tuma contacto cu cada ganado pa entrega nan premio.
Fiesta Rotaria ta mas cu un evento; ta un tradicion cu ta uni nos comunidad den un ambiente di alegria y union. Marca e fecha y bin haci parti di e celebracion! Nos ta conta riba bo presencia pa yuda haci un impacto positivo y pasa un dia sin igual.
Tocante Rotary Club of Aruba:
Rotary Club of Aruba ta un asociacion cu desde 1938 ta afilia na Rotary International. E ta consisti di lidernan comercial y profesional cu ta duna di nan mes na servicio humanitario. E ta promove e reglanan mas halto di etica den tur ocupacion y ta contribui na e desaroyo di bon boluntad y pas rond mundo. E tin aproximadamente 1.4 miyon miembro boluntario trahando den mas di 46 mil club na mas di 200 pais y teritorio.
Pa mas informacion, tuma contacto cu Shelby Maduro na 593-3185.
