ORANJESTAD – Cu hopi placer Prome Minister Evelyn Wever-Croes ta anuncia un logro grandi di Gobierno pa docentenan pa loke ta trata compensacion di e gastonan di kilometer. Ta trata di docentenan di SPO, OAA, EPB, EPI y IPA cu tin hopi studiante cu ta core stage y e docentenan mester bishita e studiantenan na e stage pa asina por guia nan.
Prome Minister ta indica cu pa mas di 10 aña discusion ta andando riba e tema aki pasobra e docentenan tawata haya un compensacion di 71 cent pa cada kilometer cu nan core pa bay na e luga di stage di e studiante. Na 2018 a yega na un otro areglo y a bin cu categorianan y el a subi di 71 cent pa 1 florin cual segun e mandatario ainda no tawata husto mirando e gastonan cu tin pa por core di un lugar pa otro.
Danki na e esfuerso di Gabinete Wever-Croes, a yega na e decision di subi e compensacion y duna 14fl pa cada kilometer na e docente. Un hecho husto y na su lugar. Esaki lo cubri e gastonan cu e docentenan tin cu nan propio auto y anteriormente tawata paga di nan propio saco.
Prome Minister ta indica cu e deseo di Gobierno ta pa e stage di e studiantenan ta mas exitoso y pesey a bin ta trahando riba e profesionalismo di stage di studiantenan cu e proyecto PEL, un proyecto grandi di ex-Minsiter Endy Croes. E logro aki ta corona e proyecto y sigura cu e studiantenan ta haya mas guia y sosten durante nan stage. Pero principalmente e ta haci husticia na e docentenan cu ta core rond di Aruba pa sigui duna guia na e studiante.
“Den nomber di Gobierno di Aruba mi kier gradici tur docente cu apesar di e compensacion abou, a sigui haci e trabou cu e mesun dedicacion y amor. Mi ta gradici EPI y EPB cu tawata e trekker den esaki y mi ta gradici ex-Minister Endy Croes cu desde di e prome dia den gobierno a bisa cu esaki ta algo cu e kier logra prome cu e baha. Pami ta un honor pa anuncia un otro logro di Gabinete Wever-Croes cu nos a logra prome cu nos baha como Gobierno. Hopi pabien na e veld di enseñansa cu e decision aki”, Prome Minister a expresa.
