Oranjestad – Despues di a bira e prome aeropuerto na mundo pa ricibi e Green Globe Certification na aña 2022, Aruba Airport Authority N.V. (AAA) ta anuncia cu orguyo cu Aeropuerto Internacional Reina Beatrix (Aeropuerto di Aruba) pa di 3 aña consecutivo a logra exitosamente e Green Globe Certification, reflehando e compromiso continuo di Aeropuerto di Aruba pa cu sostenibilidad, salud y siguridad na trabou y innovacion.
Na aña 2022, Aeropuerto di Aruba a logra su prome certificacion cu un score inicial di 78% di e criterio total di Green Globe. Desde e tempo ey, Aeropuerto di Aruba awo a yega un total di 86%, resaltando un adelanto significativo den cumplimento cu e normanan di certificacion di mas halto. Green Globe ta un di e programanan di certificacion lider pa e operacionnan sostenibel y maneho di biahe y turismo mundialmente y AAA ta hopi orguyoso di por sigui fortalece su esfuersonan sostenibel pa medio di e normanan di certificacion aki.
Pa aña 2024, AAA a pasa door di un auditorio na e sitio door di un “assurance auditor” independiente pa sigui cu e recertificacion di Green Globe. E audit di e aña aki a inclui un total di 225 criteria cu ta enfoca riba maneho sostenibel, social/economico, herencia cultural y medio ambiente. Durante henter e aña cu a pasa, AAA a introduci diferente strategia di compromiso creativo pa aumenta consientisacion di esfuersonan di sostenibilidad den personal, partnernan y stakeholdernan.
Avancenan clave a inclui procesonan mehora di “carbon accounting”, iniciativanan di conservacion expandi, y un cambio pa tecnologia moderno cu sistemanan “paperless” cu ta mehora e eficiencia mientras ta reduci consumo di recurso. AAA tambe a fortalece su programanan di Corporate Social Responsibility (CSR), fomentando impacto positivo riba comunidad a traves di asociacionnan y esfuersonan di bienestar.
Adicionalmente, a alinea e proyectonan di construccion na aeropuerto cu e normanan di LEED pa garantisa desaroyo sostenibel. A mehora e medidanan di siguridad, manera e instalacionnan nobo di Automated External Defribrillators (AED) y e sistemanan mehora di lockout, ta demostra mas aleu e compromiso di AAA pa mantene un ambiente sigur pa e biaheronan y personal di aeropuerto.
Door di incorpora sostenibilidad den e balornan central di AAA y mehora e procesonan continuamente, AAA ta reeforsa su rol como lider den operacionnan responsabel di aeropuerto.
Tocante AUA Airport Tocante AUA Airport AUA Airport ta un di e aeropuertonan mas ocupa den region Caribe, cu mas di 25 diferente aerolinea operando na Aruba contribuyendo na casi 3 miyon pasahero pa aña y brindando
servicio aereo na 31 pais y 45 destinacion non-stop rond mundo. Di e mercadonan cu AUA Airport ta brinda servicio na dje, 77% ta di Merca y Canada, 15% ta di Latino America, 4% ta di Europa y 4% ta di Caribe Hulandes. AUA Airport ta reconoce cu esaki ta danki na un economia stabiel, clima politico, hospitalidad, populacion diversifica y siguridad general di nos isla. AUA Airport su aspiracion ta pa converti den un di e aeropuertonan mas sostenibel, sigur y prepara pa futuro den e region di Latino America y Caribe, brindando un espacio laboral confiabel, cu e instalacionnan moderno y ademas cu un excelente servicio n’e cliente p’asina por refleha e hospitalidad di Aruba, contribuyendo na un futuro prospero pa Aruba.
Haya sa mas di loke ta pasando na AUA Airport door di bishita www.airportaruba.com y conecta cu AUA Airport riba Twitter.com/Aruba_Airport, Facebook.com/ArubaAirport, Instagram.com/arubaairport, TikTok.com/@arubaairport y Linkedin.com/ArubaAirport.
