Auto Rijschool Bennett cu ta e rijschool di mas grandi na Aruba. E aña aki e ta cumpli 42 aña di existencia y e ta sinti su mes yama pa reacciona ariba e maneho cu KPA, pa loke ta trata e procedura di inscripcion pa por pasa e examen di rijbewijs pa por core un vehiculo di motor.
Dialuna 24 di maart 2025 nos school a ricibi un e-mail for di e Coördinator Unit Examen Rijbewijs di KPA, un carta fecha 20 maart 2025, sin topico. Den e carta ta informa nos, cu, entrante awe 24-03-2025 e maneho di Oficina di Rijbewijs a cambia.
Cu Cuerpo Policial tin falta di Polis ta conoci, pero aki ta trata di trabao administrativo cu no ta rekeri un Agente Policial pa hasi esaki. Prome cu Covid-19, e departamento di rijbewijs tabata hopi druk cu publico cu tabata bay n’e Oficina di Rijbewijs na Santa Cruz pa:
1. Pasa examen di rijbewijs
2. Traha rijbewijs nobo of pa
3. Renoba e rijbewijs.
E rij largo cu antes tabatin na e departamento di rijbewijs a keda completamente elimina ora cu Censo a tuma e trahamento y renobacion di rijbewijs over, for di KPA.
Si compara e actividadnan di e Departamento di Rijbewijs awo cu e periodo prome cu Censo a keda encarga cu e trahamento di rijbewijs, bo por bisa cu practicamente no tin movecion di hende eynan.
Desde di e Pandemia di Covid e Departamento di Rijbewijs a para tur hende pa yega eynan sin traha un cita prome via un email. A limita e rijschoolnan pa entrega peticion pa nan alumnonan por pasa examen pa rijbewijs. Antes e rijschoolnan por a yega tur dia durante di ora di oficina. Despues a limita esaki pa solamente un bes pa siman anto pa e ora cu a wordo stipula. Ariba dje a limita e cantidad di candidato cu bo por entrega na un maximo di 5 despues a aumenta esaki na 10. Den e ultimo Carta di Maneho di KPA a bin cu ultimo exigencianan.
1. E rijschool por entrega solamente 5 peticion ariba e dia stipula pa nan.
2. Si un candidato kier pasa examen pa mas categoria di rijbewijs, por ehempel pa A.Brommer, B.Auto, C.Truck, D.Bus y C.Trailer esaki ta wordo considera como 5 peticion y como scol no por haci peticion pa ningun candidato mas.
Cu otro palabra, ta pa un persona so por haci peticion pa e siman ey
3. Mester entrega e peticion pa pasa examen cu un paspoort of cedula original. No ta acepta un copia.
COMENTARIO
Segun e reglanan di examen ta ora di pasa examen mester presenta cu un documento original. Den curso di varios aña mi a experencia cu a perde varios documento na Oficina di Rijbewijs. Como rijschool, ami no kier carga e responsabilidad di un documento y mi no ta kere cu e ta consehabel pa un departamento di Gobierno exigi esaki. Tin un motibo pakico e candidatonan ta haci uzo di e servicio di e rijschool pa pidi un fecha di examen pa nan. Hopi di nan ta traha durante e orarionan di e Oficina di Rijbewijs. Pa tur e tramitenan aki, hopi di nan tin cu pidi un mita dia di vakantie di e poco dianan cu nan ta haya pa aña.
Concluyendo mi ta conseha KPA pa consulta prome of dialoga cu e schoolnan concerni prome cu tuma un medida asina drastico, cu ta afecta tur rijschool y esnan cu ta hasi e esfuerso pa purba haya un rijbewijs. Como ex-polis mi a spera mas profesionalismo di parti di KPA y sigur di parti di Alto Comisario Arnhem.
Charles E. Bennett
Propietario Auto Rijschool Bennett
