Oranjestad-Aruba
Otmar Oduber di Fraccion di PPA ta considera cu e screening di ministernan ta un problema, e ta tardando hopi. E ta indica cu a core pasa leynan pa pretende purba ta integro, di mustra transparencia y mustra mas santo cu Papa di Roma, pasobra mayoria den Parlamento a vota na fabor di ley di screening. Hopi di esnan cu a vota posiblemente lo kier mira rubira bek y mira si a vota corectamente of no. Mescos ta e caso di e ley di financiamento di partido politico. “A crea un ley cu a fomenta pa mas cosnan menos transparente tuma lugar y no ta crea nada di e integridad cu bo ta buscando pa comunidad por haya un miho bista of sentimento cu tin mas control/screening ta tuma lugar pa tin e miho calidad den politica, sea di partido of candidatonan”.
Opinion di Otmar Oduber ta cu e ley di screening mester conta pa e persona cu ta bira minister, pa su casa y famia cu cual e ta biba. Pero na momento cu ta bay mas leu cu esey, por ehempel, no tin control riba ken you ta namora di dje of un ruman cu no ta biba bou mesun dak por ta involucra den dje. Door cu Aruba ta un sociedad chikito, e proceso di screening ta bay hopi leu y cu lo por hasta haci imposibel cu no solamente politiconan actual, pero futuro politiconan tambe, ya cu un di su famianan a haya sum es envolvi den actonan cu no ta conforme reglanan cu tin.
“Ta preocupami cu dos partido/persona cu a vota na fabor di e ley di screening ta papia di bay revise. Mester bay wake di cerca, mester wak si enberdad loke ta contene den e ley aki ta bay mucho leu of si ta den e caso aki e candidatonan specifico di Futuro y/of AVP cu ta wordo gescreen ta hayanan den problema pa motibo di e proceso di screening cu mester tuma lugar”.
Loke Otmar ta haya absurdo den su totalidad ta cu ta bay pa mas cu un of dos luna pa loke ta trata screening, pero na ningun momento tin un update di con e proceso ta bayendo. Riba e posicion cu mester respeta privacidad di hende, e miembro di Parlamento ta bisa cu na momento cu na momento cu a postula riba lista y a dicidi di bira minister, no ta existi privacidad, independiente si a haya sa cu psicologicamente no ta bon, of cu ta consume droga, of cualkier otro situacion. “Mi ta kere cu comunidad tin e derecho pa sa kico e resultado ta di e screening aki, sino bo no mester a postula bo mes”.
