ORANJESTAD – Awe mainta dos dama y dos homber a presenta dilanti Hues relaciona cu un caso di pasamento di droga den KIA via drone. Na dado momento, Hues a dicidi di pospone e caso, riba peticion di abogado mr. Griffith.
E damanan L.T. (22), K.D. (21) y e hombernan D.A. (29) y R.P. (28) di Santo Domingo, a presenta den Corte. Ta asina cu e hombernan D.A. y R.P. ta encarcela mientras cu e damanan ta den libertad.
PASA DROGA DEN KIA
E acusacion contra e hombernan D.A. y R.PO. ta cu entre 1 Juli 2024 y 20 Augustus 2024, haciendo uso di un “drone” tabata hiba droga den KIA. E damanan L.T. y K.D. lo tabata yuda den e transporte y bendemento.
Promer cu Fiscal a lesa e acusacionnan contra e grupo, el a bisa Hues cu e kier pone mas acusacion pa e sospechosonan. E acusacion cu a bin acerca contra e damanan, ta cu Fiscal ta acusa nan di ta complice di a yuda cu e transporte di droga. Pa e hombernan L.T. y K.D. tambe Fiscal a pidi pa pone acerca un acusacion. Fiscal a bisa Hues cu e acusacionnan aki no ta cambia e caso.
Abogado mr. Maldonado di e sospechosonan homber, a bisa Hues cu e no tin nada contra e acusacion cu Fiscal a pone acerca.
Abogado mr. Griffith a bisa Hues cu e ta contra e acusacion di complice cu ta trece cambio den e caso. E abogado a bisa cu e no a prepara su mes pa esaki.
HUES A POSPONE E CASO
Hues, despues di a scucha e punto di bista di Fiscal y abogadonan, a pospone e caso un rato pa bay evalua. Ora Hues a bolbe, el a bisa cu e ta aproba e acusacionnan pasobra nan no ta haci cambio den e caso. Sinembargo e caso contra e damanan, Hues ta haya cu esaki mester wordo posponi pasobra e ta compronde punto di bista di abogado, cu no a haya tempo pa prepara e acusacion extra di complice den yuda cu e bendemento di droga.
Hues a sigui bisa cu e pregunta cu ta surgi ta, con lo para cu e caso di e hombernan. Hues a splica cu si trata e caso di e hombernan, e participacion di e damanan tambe lo wordo papia ariba y si Hues dicta sentencia di e hombernan, e no por trata e caso di e damanan. E ora ey lo mester busca un otro Hues.
Hues kier trata e caso completo y pesey a dicidi cu e ta pospone e caso completo pa motibonan practico. A keda dicidi cu dia 20 Juni 2025 pa 8.30 di mainta, tratamento di e caso lo tuma lugar.
