“Danki na tur educador pa semper inculca e amor pa Aruba den curason di nos muchanan”
ORANJESTAD – Diamars mainta a tuma luga e Acto Protocolar di e celebracion di Dia di Himno y Bandera. Prome Minister Evelyn Wever-Croes durante su discurso a papia riba diferente tema. Un tema a trata di su admiracion pa e muchanan di Aruba en cuanto celebracion di Dia di Himno y Bandera.
Prome Minister a indica durante su discurso cu desde cuminsamento di e luna aki por a sinti caba e vibracion pa loke ta e celebracion di nos Dia Nacional. Por ehempel e festivalnan di canto y poësia cu composicionnan y interpretacionnan sumamente bunita reflehando e amor pa nos pais; e ferianan cultural rond di henter nos isla; e marcha cultural di Colegio Pastoor Kranwinkel na Paradera siman pasa diabierna; e Manifestacion Cultural na Plaza Betico Croes cu un explosion di creatividad, innovacion y amor pa nos patria.
“Den nomber di Gobierno di Aruba mi ta gradici tur esnan cu a hasi tur e eventonan aki asina exitoso. Den nomber di pueblo di Aruba mi kier expresa un danki special na nos maestro- y maestranan pa e forma con nan ta prepara nos alumnonan y celebra cu nan, nos Himno y nos Bandera. E aña aki mi tabata tin e honor di bishita varios scol atrobe, y e recepcion tabata hopi caluroso. E parti mas special ta keda, na momento cu mi mira tur e alumnonan di scol, para hunto y uni dilanti nan scol. Y riba nan cara expresion di inocencia, entusiasmo y speransa, hisando e bandera y cantando e himno, “uit volle borst”, manera na Prinses Amalia School siman pasa.
Danki pa sigui inculca den curason di nos muchanan, e amor pa nos Himno, nos Bandera y nos dushi Aruba. Asina, unda cu nan bai riba mundo, nan lo ta un embahador di Aruba, y representa Aruba dignamente. E ora nos por ta trankil, cu ora yega nan turno, nan lo cuida y stima e pida baranca aki, mes of mas hopi cu nos ta stim’e y ta traha p’e”, Prome Minister a expresa.
