Parlamentario Otmar Oduber NO TIN CLARIDAD RIBA PRESUPUESTO 2025 NI RIJKSWET DOOR DI PELEA DEN E MATRIMONIO CU NO TIN FIN DI YEGA ALTAR

Parlamentario Otmar Oduber comentando riba e proceso di formacion di gobierno, cual ta tardando, a bisa cu esaki ta un situacion inusual, a pesar cu den pasado tabatin formacionnan cu a tarda, pero e circunstancianan tabata totalmente diferente.
Aproximadamente 2 luna pasa Oduber a declara cu e formacion aki ta manera un matrimonio caminda cu e dos partnernan no tin confiansa den otro y ta marando e matrimonio na un cantidad di condicionnan.
Awe mas cu 100 dia despues di eleccion no solamente no tin confiansa y ta poniendo un cantidad di condicion, pero aparentemente prome cu e matrimonio ta existi ya caba un competencia di ken ta bisti carson na cas.
Cierto momento partido AVP a sali papia di 9 minister, Futuro a bisa claramente ta 7 sino fono. Esey tabata e prome ‘pelea’ publico cu tabatin, despues a sigui e parti cu a bisa cu lo bin cu mini ministers, partido AVP a bisa cu tin pensa den bin cu un forma di Secretario di Estado, Futuro a bisa publicamente un biaha mas cu categoricamente esey no ta bay tuma lugar.
Igualmente por menciona e compromiso di 700 Florin cu AVP tabatin cu e pensionadonan, pero a desfrauda nos grandinan y mester a dobla pa Futuro cu a bisa cu ta 250 Florin ta duna awor aki. Recientemente por a mira esaki un biaha mas ora kier a nombra un minister plenipotenciario, partido AVP a bin dilanti y mustra practicamente ken ta e candidato, den e caso aki Sra. Desiree Croes, un persona sumamente bon prepara y pa cual Otmar tin un respet grandi pe. Futuro a bolbe sali y bisa claramente cu ta Futuro ta dicidi ken ta bira minister plenipotenciario.
Preocupacion grandi cu Fraccion di PPA tin na e momentonan aki ta cu ta na 10 dia cu mester atende cu un presupuesto y falta menos cu un luna pa e decision cu mester tuma lugar pa loke ta trata e Rijkswet.
PPA a bisa categoricamente cu nan tawata contra e Rijkswet cu tawata riba mesa. Prome Minister a bisa cu esaki a wordo hala for di mesa y tambe aparentemente tambe tabata decision di Conseho di Minister di Reino, pero ainda no tin un draft nobo riba mesa. Por a scucha si cu tin hopi conversacionnan y negociacionnan cu ta tumando lugar riba nivel di ambtenaar. Loke PPA ta opina ta cu no por existi un Rijkswet cu no ta respeta nos derecho constitucional y nos Parlamento. E mester duna oportunidad igual dentro di Reino pa sostene otro pa haya interesnan mas abou y respeta e derecho cu nos tin como Arubiano y e lucha cu a worde hiba.
Otmar tabatin un conversacion cu Presidente di Parlamento caminda cu a mustre riba e echo cu ta violando e propio reglamento di ordo di Parlamento, pasobra Fraccion di PPA a pidi un reunion publico casi 40 dia pasa pa loke ta trata Rijkswet y nada ainda, siendo cu e reglamento ta bisa cu den 30 dia e mester wordo yama. Esey kiermen cu ta papia di política nobo, pero nada no ta cambia. E reunion aki ta importante pasobra e ora ey ta haya sa kico tur e fraccionnan den Parlamento ta para pe pa loke ta Rijkswet.
Mirando esaki, Fraccion di PPA ta preocupa cu no ta bin claridad pa motibo di e pelea cu tin den e matrimonio cu ainda no ta caba di yega altar y lamentablemente na final di dia ta comunidad di Aruba ta esun cu lo wordo invita pa entiero.