ORANJESTAD – Dia 22 di maart proximo, riba diasabra, miyones di hende, empresa y gobierno rond mundo ta participa na Earth Hour. Kico esaki ta nifica? E ta un accion cu ta encera paga e luznan pa un ora, pa asina dedica tempo un rato na conscientisacion di e importancia di nos naturalesa y con consumo di coriente, tin biaha inncesario, por afecta naturalesa y medio ambiente.
Den Caribe Hulandes tambe tin gruponan cu ta participando na Earth Hour. E orario cu esaki ta tuma lugar ta, 8:30 di anochi orario local. Na Aruba Directie Natuur en Milieu (DNM) tambe ta un di e participantenan cu lo paga luznan di e edificio situia na Uncle Louis Store na B. v/d Veen Zeppenfeld straat #7 na San Nicolas. Esaki ta un accion simbolico cu ta manda un señal na comunidad cu naturalesa ta bou di menasa di entre otro cambio di clima.
E iniciativa mundial aki, lansa na 2007 pa WWF, a bin ta crece tur aña y ta inspira hende pa haci un cambio positivo y duradero pa e planeta Tera. Wereld Natuur Fonds na Hulanda(WWF-NL) a acerca e gobiernonan y empresanan den Caribe Hulandes pa participa na Earth Hour. Hopi organisacion den region a comfirma nan participacion. Entre otro: Directie Natuur & Milieu na Aruba, Tourism Corporation Bonaire y gobierno di Saba, ta paga e luz di nan edificio. Port St. Maarten lo desconcta e luznan no-esencial di e brug di Causeway. WWF-NL ta invita e comunidad local y otro organisacionnan pa nan tambe participa na Earth Hour. Ademas di pagamento di luznan, WWF ta pidi pa haci algo positivo pa mas cu 60 minuut na bienestar di nos mundo. Esaki por encera: come un cuminda vegetariano/vegan, haci mas na reciclahe, planta un mata y recoge sushedad. DNM na su turno ta haci un yamada na nos comunidad pa haci uzo di e registro di mata cu tin riba e website di DNM. E datonan aki ta di importancia pa nos duna balor n’e importancia di existencia di matanan cu ta asina grandi cu mster clasifica esakinan como matanan monumental. Nan ta aporta pa añanan caba na combatimento di cambio di clima.
E participacion di e islanan den Caribe na Earth Hour ta mustra e dedicacion pa pone atencion na e consecuencianan cu cambio di clima ta trece cu ne y cu dia pa dia nos ta sinti e efectonan mas y mas. Islanan chikito ta extra vulnenrabel pa cambio di clima. Esakinan ta efectonan manera subida di nivel di lama y e keintamento di mundo. Debi na esakinan tin posibilidad di efectonan manera temperatura extremo, secura extremo, inundacionnan y horcan. Tur esaki tin impacto grandi riba economia di e islanan, como tambe riba e bienestar y prosperidad di e naturalesa y su hendenan.
DNM ta logra realisa e pagamento di luznan pa e dia aki y ademas di esaki nos edificio ta incorpora cambionan cu ta sostenibel. E airconan su temperatura ta regula despues cu oficina cera, cu ta 4:30 di atardi, asina ta evita mas consumo. E luznan tin un sistema automatico cu si no ta haci uzo di e espacio, e ta paga automaticamente. Ta colecta e awa condensa di e airconan pa e sistema di flush WC pa asina evita uza awa potabel di calidad halto. Den nos esapcio di oficina tin un ‘greenwall’ cu matanan cu ta yuda cu filtracion di aire. Esaki ta DNM su aporte na nos naturalesa y mundo. DNM ta spera cu comunidad di Aruba tambe bira activo y asina aporta na Earth Hour cu ta un iniciativa bon y un accion generoso cu ta encera solamente bo esfuerzo.
