Den nomber di Gobierno Mericano a gradici Prome Minister pa e bon cooperacion durante e añanan di su gobernacion
ORANJESTAD – Diaranson 19 di maart, Prome Minister Evelyn Wever-Croes, hunto cu Minister di Husticia, Minister Rocco Tjon a reuni cu Consul General di Merca pa Aruba, señor Ramon Negron, cu ta situa na Corsou.
Prome Minister ta splica cu Merca ta e pais cu ken Aruba tin e relacion mas importante pa loke ta trata nos desaroyo economico, nos turismo pero tambe pa siguridad. E consul a bin pa e celebracion di Himno y Bandera y tambe tawata presente na e recepion na honor di tur consul na Aruba dia 17 di maart.
Migracion Venezuela
Durante e reunion diaranson mainta a trata diferente tema pero e principal ta e tema di Migracion cu pa Merca ta un tema delicado y cu na Aruba ta sinti su efectonan di cerca. E situacion na Venezuela ta sigui delicado y Aruba ta hopi cerca di Venezuela y e impacto cu e migracion di Venezuela tin riba Aruba ta algo cu semper a keda bin dilanti durante reunionnan cu Merca pa asina por maneha esaki na e miho manera posibel.
Siguridad
Durante e reunion tambe a papia riba oportunidadnan economico, enseñanza y siguridad.
Aruba ta un partner importante pa Merca den mantene e region aki sigur. Aruba na varios ocasion ta intercepta contrabando entre otro di droga y arma den awanan di Aruba. Esaki ta yuda mantene nos region mas safe evitando cu e contrabando ta yega e destino, por ehempel Merca. Tur esaki ta haci cu Aruba y Merca tin un relacion hopi estrecho y ta importante pa mantene esaki asina.
Prome Minister:
“A trata di un bon reunion unda e consul den nomber di Gobierno Mericano a gradicimi pa e bon cooperacion durante e 7 aña y mey di mi gobernacion. Semper mi a coopera cu nan ora cu nan a rekeri di mi atencion y semper mi a tuma tur tema na serio. Di mi banda mi tambe a gradici’e pa nan cooperacion durante e añanan y nos a keda di acuerdo pa sigui mantene e bon lasonan den beneficio di pais Aruba”.
