Nos a tuma nota di declaracion di e dos formadornan, sr. Eman y sra. Croes, cu nan kier bay ahusta e ley di screening, pasobra e no ta practico segun nan.
Mester splica e motibo
Mi ta kere ta bon pa nan sali splica kico exactamente no ta practico. Pasobra si bo no ta condena pa ningun delito, bo no ta sospechoso den un caso penal andando, y semper abo y bo famia a cumpli cu debernan di belasting, bo ta pasa bo screening masha trankil mes. Pues no tin nada complica na e ley. Es mas e ta un proceso obhetivo cu ta wordo ehecuta door di departamentonan manera belastingdienst, FIU, Ministerio Publico y Veiligheidsdienst.
Preguntanan cu mester contesta
E pregunta mas bien cu Mike y Gerlien lo mester contesta ta, kende tin problema cu e screening? Kico e problema ta? Y dicon kier forsa pa e persona aki toch bira minister? No tin ningun otro candidato di AVP of Futuro cu por asumi e responsabilidad aki?
Motibo real di e tardansa di formacion
No ta e ley di screening ta complica. E hayasgonan di e diferente investigacionnan ta haci’e complica kisas pa cierto hende por bira minister. Es mas loke realmente a tarda ful e formacion ta cu tin problema interno den e partidonan kende lo mester bira minister, y pesey a tarda pa duna nomber. Ademas tambe e hecho cu AVP no tawata tin un programa di partido a lag’e tarda mas. Y te ainda no tin ningun acuerdo di gobernacion entre e partidonan.
Ta urgi ambos partido pa pone interes general, interes di Aruba, dilanti di e interes di nan partido y algun miembro. Pa asina formacion por keda cla, pasobra e situacion actual no ta bon pa Aruba.
