Cu e obhetivo di conmemora e Dia Internacional di Hende Muhe, Red Arubiano di Prensa Profesional (RAPP) a organisa un tayer dirigi na periodistanan femenino denomina ‘Reporting Safely for Women Journalists’ pa asina enfoca riba seguridad y salud mental di esnan cu ta eherce e trabou di prensa.
E evento, cu a tuma luga diasabra 15 di maart na Impact Hub Aruba, a uni un grupo di periodista femenino cu pa hopi biaha ta enfrenta desafionan cu ta afecta tanto nan seguridad fisico como nan bienestar mental. For di ‘online bullying’ y discriminacion den trabou te cu cubri temanan sensitivo manera corupcion politico y inhusticianan social. E situacion aki hopi biaha ta resulta den menasa, agresion y discriminacion cu ta aumenta e risiconan di stress, cansancio mental y aislamento profesional.
Door di crea un plataforma pa comparti experiencianan nan kier kibra e aislamento aki y demostra cu ta bon pa pidi ayudo. Na mesun tempo, nan a enfoca riba hermentnan practico pa maneha stress, desaroya strategianan pa enfrenta desafionan, pone enfoke riba cuido personal y mehora seguridad en general.
Un danki grandi ta bay na e fundacion MamaCash cu a haci e tayer aki posibel. MamaCash ta un organisacion cu entre otro ta apoya hende muhe den boga pa nan derechonan y esaki a alinea cu RAPP su meta pa empodera e periodista cu conocemento y confiansa pa navega e presionnan di periodismo mientras ta proteha nan bienestar.
E tayer a trece un sentimento di union y apoyo entre e participantenan, compartiendo experiencianan personal y siñando di otro tocante desafionan di e profesion periodistico.
Den e sesionnan dinamico ofreci pa e psicologo y coach Sabrina Sonensein, e participantenan a haya capacitacion practico pa maneha stress, tipsnan pa tin un bon salud mental y desaroya strategianan pa enfrenta menasanan y agresionnan cu por afecta nan trabou diario.
Red Arubiano di Prensa Profesional (RAPP) cu ta dedica na stimula e practica liber di periodismo y normanan di comportacion etico y asina ta traha pa inspira y educa e periodistanan actual y futuro periodistanan pa medio di desaroyo profesional. Tambe ta proteha e garantianan fundamental di libertad di expresion y libertad di prensa pa medio di su esfuersonan di defensa.
Un invitacion ta bay na e gremio periodistico na Aruba cu ainda no ta riba e lista di contacto pa manda un email pa haya mas informacion tocante RAPP y con por bira miembro. Pa esaki por tuma contacto cu Red Arubiano di Prensa Profesional via email: [email protected].
