Un tradicion desde aña 1997
ORANJESTAD – 17 di maart, na bispo di nos Dia Nacional, Dia di nos Himno y Bandera, prome cu mey anochi, a tuma luga e tradicional hisamento di e bandera mas grandi di Aruba na Cede di Partido Movimiento Electoral di Pueblo.
Lider di MEP, Evelyn Wever-Croes tawata presente hunto cu varios colega y a hisa e bandera mas grandi di Aruba net mey anochi, y a canta nos Himno. Un tradicion cu Lider di MEP a percura pa continua cun’e y engrandece cada bes mas. Un publico grandi tawata presente na Cede di MEP y a presencia Lider di MEP, hunto cu candidatonan, cu acompañamento di brassband cana cu e bandera di Aruba pa despues e bandera wordo hisa y e himno wordo canta.
E evento special aki ta un tradicion cu a cuminsa na aña 1997 cu señor Harry Croes y señor Rudy Croes, ambos den feliz memoria, como un iniciativa pa uni pueblo di Aruba y lanta e sentimento patriotico di cada ciudadano.
Lider di Partido MEP a expresa cu e evento aki na bispo di Dia di Himno y Bandera, tur aña, ta lanta un sentimento di orguyo y alegria inmenso, ora mira e bandera mas grandi di Aruba bay halto.
