ORANJESTAD – Minister Oduber ta hopi contento, orguyoso y agradecido pa tur loke a wordo logra durante su 2 periodonan como minister encarga cu salud publico. Ora e la drenta den gobierno na aña 2017 como Minister di Salud e la hereda chaos y desaster. E la hereda un ministerio di salud sin vision, sin direccion, un AZV sin placa, inversionan no tawata tin niun inversion den cuido, no tawata tin comunicacion entre stakeholders, dokternan di cas a wordo lubida, lista di espera tawata mas cu 1 aña largo y un proyecto di hospital sin guia y direccion. Un cuido medico caminda studiantenan cu a studia medicina den region a wordo engaña cu nan lo haya nan Arubig.Tur cos a cambia danki na cambio di gobernacion y danki na minister Oduber cu un team hopi dynamico cu a percura pa atencion wordo duna di berdad na salud di nos hendenan. Minister Oduber a hiba un maneho concentra riba prevencion, haci inversionan den cuido medico y percura pa mehora e calidad di cuido y servicio.
- Awe danki na e maneho aki nos su yuinan di tera, cu a studia medicina den region, ta wordo reconoci y Aruba tin su propio registro di Arubig cual ta un logro historico.
- Di e forma aki a percura pa prome biaha den historia Aruba tin un plan nacional di prevencion. A lanta Healthy Lifestyle Center cu tin mas di 800 cliente activo unda a yuda cambia e clientenan estilo di bida pa uno saludabel. E Proyecto aki a yuda salba bida di hende y clientenan ta masha contento cu e centronan aki. Un Proyecto cu Minister Oduber no kier ni imagina cu e minister di salud nobo lo desea di stop pa asina yuda acomoda amigonan di AVP.
- Ministerio di Salud a percura pa inverti miyones den mehoracion di calidad di cuido y servicio. ImSan tin e miho centro di radio terapia den henter caribe. A percura pa 22 camanan na ImSan ta den uso. Na hospital a inverti den interventie cardiologie y recientemente den un hyperbaric chamber.
- Despues di mas di un decada dokternan di cas tin un acuerdo nobo cu AZV cu mas beneficio. A percura pa instrui AZV pa paga indexering na tur dunador di cuido y mehora condicionan laboral pa specialistanan medico.
- Pa prome biaha den historia tin un “zorgakkoord” caminda tur partner den cuido medico na Aruba ta alinea den e rumbo y direccion di cuido medico na Aruba, esaki sigur ta algo historico.
- Listanan di espera a wordo baha danki cu a pone presupuesto pa yena vacaturanan di varios specialismonan.
Minister Oduber ta spera cu tur e proyectonan cu e la laga atras lo continua. Proyectonan manera:
- Zorgakkoord
- Plan nacional di prevencion
- Aruba Healthy Lifestyle Center
- Indexering pa dunadornan di cuido (a pidi AZV pa percura pa pone fondonan)
- Mehoracion di condicionan pa specialistanan medico
- Arubig
- MOU cu LUMC
- MOU cu El Bosque
Un Proyecto cu ta canando y minister Oduber ta kere cu mester percura pa bira realidad ta e PET CT scan pa ImSan.Minister Oduber ta sinti contento pa tur loke a ser logra y esaki ta danki na e team di Ministerio di Salud. Un team dinamico, un team profesional , un team cu conocemento y experiencia cual Minister Oduber ta hopi agradecido pa hunto a logra tur e exitonan aki. Tur loke a wordo haci y logra ta a base di teamwork y e team aki sa cuanto esfuerzo a wordo haci bao di hopi tension y presion pero cu un bunita resultado pa salud di nos hendenan. No tin nada mas bunita cu mira bek tur loke a wordo haci pa tin un comunidad mas saludabel y cu un mihor cuido y servicio. Minister Oduber no por lubida e bon synergia entre Ministerio di Salud, DVG, IVA, HOH, ImSan, HAVA, ASHA, WGK, FEPO, FAVI y Associacion di Laboratorionan. Ministerio di Salud a haya tambe tremendo ondersteuning di zorgeconoom Patrick Jeurissen como tambe Edwin Brugman cu a yuda enormemente.“Un danki di curason na tur partnersnan pa tur boso sosten, cooperacion y bon synergia di trabou. Hunto nos a logra hopi cu ta yenami cu orguyo y satisfaccion pa sirbi mi pais di e manera cu mi a hacie. Cu un curason contento y gratitud grandi mi ta laga atras bunita proyectonan pa salud di nos hendanan cu mi ta spera cu sin excepcion mira continuidad. – Minister Dangui Oduber
