Paradera – Diamars anochi ora cu caya ya mester tawata basta keto caba habitantenan di Paradera ta scucha un zonido masha duro mes.
Tawata den careda di 10’or y mey cu un accidente serio ta sosode poco pabou di ex Pacifico Restaurant. Prome Informacion tawata bisa cu un di e autonan a bolter.
Mesora polis a bay e sitio cu urgencia. Na yegada, un di e autonan cu a bolter ya “nan” a bolter e bek. E auto ey tawata un Toyota Tercel color blanco.
E accidente a sosode ariba e t-weg cu ta conduci pa bay Jaburibari, un caminda conoci pa accidente.
Mas leu por a mira un Kia Picanto. E problema a cuminsa momento cu emocionnan a bay halto y alabes efecto di alcohol a tuma over.
Palabranan di insulto y no sigui ordo di polis a pone cu a pidi refuerso, mirando cu si mas polis no yega cos lo sali for di man y tawata tin solamente 2 agente policial na e sitio.
Informacion cu polis a ricibi y por a tende esaki tambe na e sitio cu e Tercel tawata pustando y e Kia Picanto lo a bira nan dilanti.
Dos persona a keda deteni, un tata y un hoben cu parse di ta su yiu. E tata a nenga di tawata stuur e auto durante e pustamente, pero un di su yiunan a bisa polis cu su tata tawata na stuur.
Ambulance a presenta, pa a trata cu un otro yiu di e homber cu a haya golpi na pia pero nada serio.
Elmar a presenta pa atende cu e wayanan cu a keda benta ariba caminda.
