“Organisando actividadnan cultural pa e muchanan na un edad jong, na unda nan ta goza, pasa pret, y wak atras riba un bunita experiencia, ta loke ta siña nan biba nos cultura, y na grandi nan lo sigui balor’e y bib’e.”
ORANJESTAD – Diabierna mainta, den conexion cu Dia di Himno y Bandera, Colegio Pastoor Kraanwinkel a organisa un bunita parada cultural den e cayanan di Paradera. Prome Minister Evelyn Wever-Croes tabata presente pa asina admira y disfruta di e bunitesa y creatividad cu e docente y alumnonan a desplega e mainta aki.
Prome Minister tabata sumamente impresiona pa mira cu tur klas a participa na e evento y na unda cada un a bin cu un diferente tema, manera naturalesa, flora, fauna, monumento etc. E muchanan tabata hopi enthusiasma y tabata baila y goza hopi den e parada.
E mandatario a expresa cu e tipo di actividadnan asina ta netamente loke nos como adulto mester brinda nos muchanan, pa asina di trempan e muchanan cuminsa siña stima nos cultura. Manera Minister di Cultura Xiomara Maduro semper a bisa “Cultura bo tin cu bib’e”, y organisando actividadnan cultural pa e muchanan na un edad jong, na unda nan ta goza, pasa pret, y wak atras riba un bunita experiencia, ta loke ta siña nan biba nos cultura, y na grandi nan lo sigui balor’e y bib’e.
Prome Minister ta felicita Colegio Pastoor Kraanwinkel cu e bunita iniciativa aki. Tambe ta felicita e cabesante, mayornan, y tur docente cu a traha hunto cu e muchanan pa haci e parada aki uno exitoso.
