Poema dedica na Poeta di Patria
E celebracion di Dia di Himno y Bandera dia 18 di maart proximo a cuminsa cu e evento “Poeta di Patria” cu a tuma luga diaranson anochi na Fort Zoutman. Pa e di 12 edicion di “Poeta di Patria,” un total di 16 participante a declama nan amor patrio den nan poema dedica na nos dushi Pais Aruba.
Minister Maduro di Cultura a hiba palabra na inicio pa desea suerte y gradici tur e participantenan pa nan amor expresa pa Aruba den cada poema. E mandatario a gradici tambe e huradonan pa nan tempo y experticio brinda pa haci “Poeta di Patria” un exito cada aña despues cu sr. Atan Lee den feliz memoria a forma e fundeshi pa e evento unico aki.
Como muestra di aprecio na e participantenan, hurado y Comicion Celebracion Dianan Nacional cu ta haci e evento “Poeta di Patria” aki cada bes mas special, Minister Maduro a dedica y declama un poema di propio inspiracion.
E mandatario a expresa cu aunke e no ta poeta, durante tur e añanan, e evento “Poeta di Patria” a sirbi di inspiracion pa scirbi e poema “Aruba, nos baranca tan stima.”
Aruba, nos baranca tan stima
Solo ta briya bo
Luna ta ilumina bo
Lama ta rondona bo
Y biento ta caricia bo
Aruba, esta un dushi tera bo ta
Un baranca fuerte y resiliente
Un luga Bendiciona
Dichoso nos ta, tur cu ta habita bo
Bo ta un isla di encanto
Cu ta namora tur cu ta bishita bo
Aruba, cuna venera
Dushi tera yena cu flor di libertad
Aruba, nos baranca tan stima
