Recordando e di 5 aña di Covid-19
ORANJESTAD – Diahuebs mainta riba e di 5 aña di e pandemia mas grandi cu mundo a conoce Covid-19, Prome Minister Evelyn Wever-Croes a invita e comicion di crisis team pa un supuesto conferencia di prensa. E comicion aki ta consisti di señor Rino Hermans di Bureau Rampenbestrijding Aruba, señora Ronella Croes di Aruba Tourism Authority, señora Sharline Koolman cu ta consehero di Ministerio Social, y señora Vanessa Kock cu ta encarga cu e landenpakket y cu siguridad di frontera.
Na nan yegada na bestuurskantoor, nan a wordo ricibi pa Prome Minister den e sala di conseho di minister. E encuentro aki tabata uno hopi special na unda hunto, nan a bay bek den tempo y recorda tur loke e pandemia aki a trece cune y e esfuerso cu esaki a rekeri di cada un di nan. Despues di a comparti un rato hunto recordando tur e momentonan bon y malo cu e pandemia aki a trece cune, Prome Minister a sorprende cada un di nan cu un reconocemento, gradiciendo nan pa nan guia, dedicacion y trabou duro cu nan a eherce durante di e temporada di e pandemia.
Na nan turno, cada un di nan tambe a expresa palabranan di gradicimento.
Señor Rino Hermans
Señor Rino Hermans a expresa di ta hopi agradeci cu reconocemento aki cu ta simbolo di trabounan duro cu nan a haci pa saca Aruba mas lihe posibel di e situacion cu e pais tabata aden. Loke el a siña di e pandemia aki ta cu e pueblo aki ta resiliente y cu por unifica caminda cu mester pa ta exitoso. E ta gradici Prome Minister pa semper a kere den e capacidad y conocemento di e crisis team.
Señora Ronella Croes
Señora Croes a remarca cu pa su persona e ta un honor di por comparti un rato cu otronan cu tambe a hunga un rol importante durante e pandemia y refleha riba e reto y logronan cu nan a sa di contra aresta exitosamente. Tambe el a expresa cu di su banda nan ta hopi agradecido y orguyoso di locual Aruba a desplega internacional y local.
Señora Sharline Koolman
Señora Koolman a tuma e oportunidad di gradici Prome Minister pa su guia y sosten durante e crisis aki. El a indica cu e proceso no tabata uno facil pero na un manera hopi profesional nan por a deal cu otro. Tambe el a expresa cu Prome Minister semper a para nan tras y a sigui e consehonan cu nan tabata dun’e y danki na su sosten Aruba por a sali di e situacion aki di e miho manera.
Señora Vanessa Kock
Señora Kock a tuma e oportunidad di gradici tur e profesionalnan cu ta of a forma parti di e crisisteam. Durante e crisis aki, cada un a mustra nan profesionalismo pa asina bou guia di Prome Minister hunto por a yega na un resultado positivo pa pais Aruba. El a gradici Prome Minister pa e reconocemento y pa semper a sostene y confia den nan conocemento y vision durante e pandemia aki.
Prome Minister a gradici cada un di nan pa semper tabata disponibel durante e momentonan dificil di e pandemia, pa tur nan consehonan cu no tur ora tabata esunnan di mas facil, y pa nan guia y sosten na su persona.
Despues di e reconocemento aki, señor Rino Hermans como cabes di e crisisteam tambe a entrega Prome Minister un reconocemento pa gradici’e pa tur locual el a haci pa e comunidad di Aruba y e pais en general. El a indica cu e decisionnan cu Prome Minister mester a tuma no tabata facil, e caminda cu e mester a cana tabata tin hopi reto, pero danki na e amor grandi cu e tin pa pais Aruba, tur su esfuerso y dedicacion awe tin su fruto.
Pa pueblo di Aruba y mundo henter e pandemia aki a trece cune hopi inkietud, pero danki na Prome Minister Evelyn Wever-Croes cu a traha dia y anochi pa bienestar di pueblo, e guia profesional di e comicion di crisisteam, y e sosten di comundidad completo, awe Aruba ta progresando den un pais mas fuerte y resiliente.
