ORANJESTAD – Recientemente Minister Plenipotenciario na Merca, Sra. Zulema Dabian-Erasmus, a organiza un evento pa profesionalnan Arubiano na New York City. Den cuadro di e luna di Himno y Bandera a invita Arubianonan na New York na e Consulado-General di Reino pa topa otro y conoce e Minister Plenipotenciario.
Na New York City tin Arubianonan cu ta haci trabou significante. Un evento asina cu ta trece Arubianonan hunto ta importante pa keda cultiva e relacion cu Aruba y otro Arubianonan.
E evento a tuma lugar na Consulado-General di Reino cu ta situa meymey di tur e ‘skyscrapers’ na Midtown Manhattan. Bou di tononan crioyo di Padu del Caribe, Jeon y mas, e invitadonan por a reconecta cu otro. Claro cu na prome lugar tur hende ta curioso, kico uno ta haci na New York. Asina a tende for di profesionalnan den e sector bancario, farmaceutico, seguro, accountancy, arte, business, social impact y mas. Tambe a combersa di futuro di Aruba y a repasa hunto e memorianan haci na Aruba. Na final e comentarionan tabata hopi positivo pa cu e inciativa aki.
Na 2024, durante e prome aña di sra. Zulema Dabian-Erasmus como Minister Plenipotenciario a trece Arubianonan na Washington D.C hunto pa un dinner pa celebra nos Himno y Bandera.
Hopi Arubiano, aunke leu di cas, ta keda interesa den loke ta pasa na Aruba. Hopi kier aporta na Aruba pa medio di nan netwerk, nan tempo y ideanan. Nan ta keda parti di Aruba y Aruba ta keda parti di nan! Eventonan asina ta importante pa mantene nan relacion cu nan isla natal.
