“Te riba e ultimo dia, mi lo ta trahando representando orguyosamente cada ciudadano di Aruba”
ORANJESTAD — Despues cu Aruba a celebra Dia Internacional di Hende Muhe den gran forma, Prome Minister Evelyn Wever-Croes a biaha pa Nacionnan Uni pa atende e “69th Commission on the Status of Women (CSW69)”. CSW conference cu ta tuma luga anualmente unda paisnan ta manda nan lidernan, specialmente lidernan femenino, pa duna cuenta riba e trabounan cu nan ta haciendo riba derechonan di hende muhe y mucha muhe.
Durante e Ministerial Round Table, cu ta un di e reunionnan mas importante di e conferencia, ministernan di cada pais ta hiba palabra y ta duna un update di kico nan ta haciendo en cuanto e tema di derechonan di hende muhe y mucha muhe. Prome Minister di Aruba, na su turno a splica cu Aruba ta pone hopi atencion y enfoke riba e posicion di hende muhe y mucha muhe. Durante su gobierno a traha un Gender Policy unda ta indica riba e posicion di hende muhe y mucha muhe y kico mester haci pa fortifica nan posicion y duna nan mas oportunidad. Pa su persona, como un Prome Minister femenino esaki ta algo di gran importancia y por mira resultadonan positivo ya cu Aruba a avansa hopi pero ainda tin hopi reto.
Tambe durante e reunion a papia riba ‘gender-based violence’ cu ta violencia contra hende muhe simplemente pasobra e ta di e sexo femenino. Aki Prome Minister a duna un splicacion di tur loke Aruba ta haciendo pa esey y cu ainda tin algun ley cu mester atende cu nan, pero eynan Gobierno hunto cu stakeholders y NGOs ta trahando duro pa por finalisa.
E ‘Commission on the Status of Women’ ta e principal organo intergubernamental mundial dedica exclusivamente na promove igualdad di genero, derechonan y empoderamento di hende muhe, documentando e realidad di nan bida rond mundo y forma standardnan global riba esaki.
Prome Minister:
“Pero ora bo papia di hende muhe, bo no ta papia solamente di violencia y obstaculonan. Ami ta enfoca tambe riba oportunidadnan cu nos por crea pa e hende muhe principalmente den e area di tecnologia. Esaki ta bin cu su reto- y riesgonan pero tin hopi oportunidad den e area ey pa nos hende muhenan y mucha muhenan, y nos ta bin ta haciendo esaki pa varios aña caba a travez di Futura.
Cu hopi orguyo mi a comparti tur e storianan di exito di Aruba durante mi discursonan. Ainda tin mas reunion- y eventonan pa atende unda mi lo sigui trece padilanti e storianan di exito y e vision- y logronan di Aruba. Te riba e ultimo dia, mi lo ta trahando representando orguyosamente, cada ciudadano di nos dushi isla Aruba”.
