Un programa nobo cu ta conecta comunidad di Aruba cu naturalesa atraves di programanan di educacion y concientisacion.
ORANJESTAD, ARUBA – Aruba Conservation Foundation (ACF) como un organisacion independiente di maneho di conservacion ta anuncia e introduccion di e programa ‘Naturalesa ta Papia’ – un programa nobo diseña cu e meta di conecta e comunidad di Aruba, grandi y chikito cu Aruba su naturalesa diverso atraves di diferente sesionnan manera discurso, actividadnan interactivo, y encuentronan educacional pa stimula un conexion cu Aruba su naturalesa.
ACF den su rol di educador ta facilita experiencianan educacional cu ta memorabel, cu ta inspira, y transforma. Esaki por medio di enfoke riba Aruba su naturalesa unico, herencia cultural, conservacion, y practicanan sostenible pa asina participantenan por conecta emocionalmente y crea un comprondemento mas profundo di balornan di naturalesa cu nos ta proteha.
Como parti di e programa ‘Naturalesa ta Papia’ ACF ta lansa un actividad yama ‘Encuentro di Conocemento’ cu lo tuma lugar na diferente ocasion durante aña 2025, unda cu cada encuentro lo pone un enfoke riba diferente temanan di naturalesa. Akinan, conocemento ta wordo comparti den un manera educativo y interactivo pa un y tur.
E prome ‘Ecuentro di Conocemento’ a tuma lugar dia 6 di maart y a enfoka riba Mondi di Mangel unda cu diferente expertonan di ACF hunto cu Ban Lanta y Planta a comparti y demonstra e rol importante cu Mangel tin pa naturalesa. Atendi pa 40 persona na MFA Savaneta, e anochi tawata uno informativo cu a laga participantenan contento di por a siña mas tocante e mangelnan di Aruba participa activamente den e actividadnan pa comprende mas di cerca e funccion di e sistema ecologico akinan.
E proximo ‘Encuentro di Conocemento’ lo enfoke riba e tema di Mondi di Mangel un biaha mas dia 10 di april 2025. Lugar di encuentro lo wordo anuncia despues.
Pa mas informacion por tuma contacto cu Aruba Conservation Foundation na [email protected] of por bishita paginanan social Facebook of Instagram.
