Museo Arqueologico Nacional Aruba (MANA) lo ofrece otro celebracion varia y atractivo pa grandi y chikito 18 di maart awor. Den colaboracion cu Club Kibrahacha, “Santa Rosa”, Muchila Creativo y artistanan local ta ofrece un programa interesante entre 10’or di mainta pa 3’or di atardi.
Club Kibrahacha un biaha mas ta treciendo alegria cu nan cuarta y canto, presentacion di baile y mas na MANA riba e dia aki. Departamento di Agricultura y Pesca, “Santa Rosa” lo tene un ‘mini marshe’ den “Hardin di mi Wela”. Lo tin entre otro berdura, carni fresco, ‘microgreens’, ‘mushroom’, Kombucha, licor y juice di fruta, sauce di ingredientenan local y honing.
Muchilla Creativo lo agrega sabor na e dia cu un Festival di Sopi pa recauda fondo den “Hadrey di MANA”. Lo malcria e bishitantenan cu un koffiemorgen dushi cu chuculati pinda, bolo y snacks crioyo.
Artistanan Paola Harper y Sylvia Eizinga lo guia un tayer di pinta y decora un yabero of mini cuadra cu simbolo di Aruba. E tayer ta costa Afl.15,- y ta basa riba ‘first come, first serve’ entre 10’or di mainta y 3’or di atardi. Artista contemporaneo local Velvet Zoe Ramos lo tene un charla y un presentacion artistico poetico pa 12.30 ‘or den su Xposicion “Interlasado: Pasado Presente”. Sea na ora pa participacion maximo!
Riba e dia nacional aki arkeologo Raymundo Dijkhoff lo tene dos presentacion den auditorio di MANA tocante Data y Analisis: Resultado y Interpretacion di Santana St. Cruz 35. E presentacion aki ta e di dos den e ciclo di tres tocante e Santana Sta Cruz 35. E prome presentacion lo ta di 11’or pa 12’or di mainta. E di dos lo ta di 1’or pa 2’or di merdia. E capacidad di auditorio ta maximo 50 persona loke ta nifica cu ora yega maximo no por permiti mas persona drenta.
Scoge pa gosa, baila, y celebra hunto cu famia, amigo y sernan keri di un dushi ambiente na MANA dia 18 di maart awor. Entrada ta gratis. Si ta desea por laga un cariño den cahita di donacion.
