Oranjestad Aruba – E miniserie Tambu y Baile ta estrena live riba Youtube, riba dia di Himno y Bandera y asina clausura e proyecto cu ta inclui participacion di artistanan local manera Kevin Kendrick Eduardo Junior Gumbs, Shaindra Ashby y Tuesday Gonzalez Irwin. E miniserie tin meta educativo, dirigi riba hoben como grupo di enforce. Ta duna conocemento riba Historia di Sclavitud den Caribe Hulandes incluyendo Aruba.
E miniserie lo repasa echonan historico di un temporada scur, unda e comercio di esclavo tabata tuma lugar den nos region, lo hasi un recorido den tempo pa yega den presente. E contenido ta pone lus ariba herencia Africano ta bibo y presente den expresionnan moderno manera baile y musica.
Tambu y baile a hunga un rol imporante den e expresion di nos antepasadonan cu tabata forma parti di e sociedad cu nos ta bibando aden awor. E meta di e produccion aki, ta pa crea imagenan visual cu por inspira hobenan interesa den nos historia comparti i habri nan interes pa sigui conserva herencia Tambu cu ta bayendo perdi na Aruba.
For di cuminsamento di juli 2024 a inincia cu e trabounan di produccion pa e miniserie Tambu y Baile. E produccion consistiendo di 5 episodio ta conta cu apoyo di un team relativamente hoben, cu entre otro a eherce trabounan di coordinacion y investigacion (Jeanelij “Ginelly” Quandt), filmacion, edita y sonido (Chando Held), naracion (Tasho Eargelon Florentina)
E proyecto aki a wordo inicia bou di e programa di Aña di Conmemoracion di Historia di Sclavitud y ta conta cu sosten di UNOCA Aruba y NiNsee Nationaal Instituut Nederlands Slavernijverleden en Erfenis. Ta hasi un yamada na scolnan, institucionnan di educacion na Aruba pa comparti e produccion aki cu nan alumnonan y encurasha hobennan pa pensa y dialoga tocante nos pasado comparti.
Pa mas informacion por tuma contacto cu peticionario di e proyecto Ginelly Quandt pa medio di e plataforma Luango297 activo riba media social pa mas informacion. Youtube/ Luango297 [email protected] of https://www.facebook.com/Luango297/
