Prof. dr. Wouter Veenendaal, profesor di Relacion di Reino y profesor asocia den politica comparativo na Universidad di Leiden, ayera, dialuna, a tene su discurso inaugural. Veenendaal a tene e discurso inaugural aki como titular di e catedra di Representacion Democratico den Reino. Aña pasa ministerio di Asuntonan Interno y Relacion di Reino (BZK) a instala e catedra aki.
Agenda di investigacion
Durante su discurso titula ‘Riba pia igual? Escala y democracia denter di e relacionnan den Reino’ Veenendaal a profundisa mas den e diferente componentenan di su agenda di investigacion como titular di catedra. Pa e catedra, Veenendaal a formula 2 meta: garantisa y amplia investigacion tocante Reino y Relacion di Reino, y promove cooperacion riba tereno di investigacion y enseñansa cu universidad- y cientificonan riba e islanan Caribense. Pa logra e ultimo meta aki, Veenendaal ta reclutando tres asistente di investigacion local na Aruba, Corsou y Sint Maarten.
Den e añanan benidero nan lo bay haci investigacion hunto cune como team di investigacion di Reino completo.
4 liña di investigacion
Durante su discurso inaugural Veenendaal a splica e 4 liñanan di investigacion di su catedra, cu e ta spera di bay establece. Esakinan ta: politica y democrasia riba e islanan Caribense den Reino mes; representacion democratico di e islanan Caribense den Reino; con ta experencia Relacion di Reino na Hulanda Europeo; y investigacion comparativo riba otro areanan no-soberano.
Encuesta di opinion
Durante su discurso Veenendaal a anuncia ademas e prome resultadonan di un encuesta di opinion cu el a laga haci bou di Hulandesnan Europeo den preparacion pa su discurso inaugural. A conduci e investigacion bou di e grupo di experto renombra di LISS di Universidad di Tilburg. Mas of menos 2,700 persona a participa den e encuesta aki y a contesta diferente pregunta di conocemento y opinion tocante Reino. Ta pa prome biaha cu a tene un encuesta di opinion di e magnitud aki na Hulanda tocante Reino.
Imagen mas positivo
E resultadonan di e encuesta di opinion aki ta demostra cu Hulandesnan Europeo sa poco tocante Reino y relacion di Reino. Solamente un cuart ta bisa cu nan ta na altura di esaki. Toch nan tin un imagen mas positivo di Relacionnan di Reino cu hopi biaha ta pensa. Asina por ehempel un mayoria ta di opinion cu habitantenan di e islanan mester ta liber pa sigui muda pa Hulanda y cu Hulanda tin un obligacion moral pa percura pa e islanan. E grupo mas grandi ta opina tambe cu Hulanda mester sostene e islanan financieramente y cu habitantenan di Hulanda Caribense mester tin e mes beneficionan social cu na Hulanda Europeo.
Hopi ceremonia
Formalmente e discurso inaugural a sirbi como aceptacion di Veenendaal su funcion como profesor special recien nombra. Un discurso inaugural ta un evento importante cu hopi ceremonia. Manera ta custumber otro profesornan tabata presente, tur bisti den nan toga.
Comision di guia
E comision di guia pa e catedra, yama tambe curatorio, ta consisti di presidente Marja Spierenburg, profesor di antropologia di desaroyo duradero y medionan di existencia na Universidad di Leiden, Gert Oostindie, profesor emerito di historia colonial y post colonial na Universidad di Leiden, Tom Louwerse, profesor asocia di ciencia politico y director di investigacion di Instituto di Ciencia Politico di Universidad di Leiden y Saskia de Reuver, Director di Relacion di Reino di Paisnan di ministerio di BZK.
Desaroyo di conocemento
De Reuver a felicita Veenendaal na nomber di directorado-general di Relacion di Reino y ministerio di BZK. ‘E catedra cu Wouter Veenendaal ta ocupa ta hopi importante pa desaroyo di conocemento den y tocante Reino. Ta maraviyoso pa mira cu Wouter ta atendiendo e encargo aki cu asina tanto entusiasmo y profesionalismo.
