Durante e conferencia organisa pa Bold Ladies
Diabierna merdia Prome Minister Evelyn Wever-Croes tabata presente na Costa Linda Beach Resort pa un conferencia organisa en conexion cu Dia Internacional di Hende Muhe, pa Bold Ladies. E tema di e conferencia aki ta Boldly Empowered. Prome Minister a expresa di sumamente contento di a wordo invita pa ta un orador na e conferencia importante aki cu a conta cu un sala di mas o menos 30 pa 40 hende muhe papiando di liderasgo femenino.
Durante su discurso Prome Minister a comparti loke pa su persona ta importante ora ta trata di liderasgo femenino. El a splica cu ta hopi importante pa cada un di nos hende muhe ta consciente cu ora lidernan femenino baha di un posicion, tin otro lidernan femenino prepara pa asumi posicionnan di lidersago, y cu si e hende muhenan no ta hopi enfatico riba esaki y lague pa casualidad, esaki no lo pasa.
Tambe, Prome Minister a expresa di ta convenci cu mas lidersago fememino na Aruba ta hopi bon pa desaroyo di Aruba en general. El a comparti cu tur presente kico ta loke ta funciona pa su persona mei mei di un trabou cu hopi responsabilidad y hopi stress, y tambe e importancia di busca un balans den su bida y cua areanan ta yuda su persona encontra esaki.
“Mi ta gradici e Bold Ladies nan aki pa e invitacion, y tur e damasnan cu tabata presente pa nan atencion den e discurso. Mi kier felicita tambe tur hende muhe pa cu Dia Internacional di Hende Muhe y gradici e ser masculinonan cu ta sostene nos den e posicionnan di lidersago” Prome Minister a expresa.
