NO PAGA LUS DI UN OTRO, PA DI BO BRIYA MAS.
Diasabra awor, 8 maart, ta Dia Internacional di Hende Muhe. Pami e dia aki ta un dia di refleccion, di compromiso y di celebracion.
Un dia di refleccion riba e papel importante cu hende muhenan ta desplegando na Aruba. Como hende muhe nos ta trece otro cualidadnan na mesa. Nos ta usualmente mas empatico, nos ta dirigi nos mes mas na busca solucion, y mayoria di nos no ta permiti ‘ego’ hunga un rol. Mi ta convenci cu si nos tabata tin mas lidernan femenino, lo tin menos guera na mundo.
New York Times a publica un articulo na november 2018 titula “Aruba: where women lead”. Den e entrevista cu New York times, mi a trece padilanti cu liderasgo femenino ta sigur un di e factornan cu ta determinando e exito di Aruba. Na Aruba tin relativamente hopi lider femenino ta dirigi diferente organisacionnan y institutonan.
Pero nos sa tambe, cu no ta tur hende muhe ta haya oportunidad of trato igual manera hende homber. Pesey dia 8 di maart ta un dia importante pa nos reconfirma nos compromiso pa percura cu nos hende muhe y nos mucha muhenan haya trato igual, y oportunidadnan igual.
Aparte di esaki, dia 8 di maart mester ta un dia tambe di celebracion. Un dia pa celebra nos exitonan como hende muhe. Y aki na Aruba tin hopi ehempel di exitonan cu nos por ta hopi orguyoso di nan.
Un cos si, tur e avancenan aki, no a bin dimes, y nos no mester lag’e na casualidad y kere cu hende muhenan den futuro lo tin tur e oportunidadnan dimes. Si nos kier pa nos yiu muhenan, nan yiu muhenan y tur mucha muhe tin oportunidad igual real den liderasgo den nos pais, nos mester tuma pasonan conciente di awor caba, pa prepara e siguiente generacion. Actualmente tin hopi hende muhe den posicion di liderasgo na Aruba. Nos no a logra e posicionnan aki facilmente, algun di nos mester a lucha duro, mester a kibra plafonnan di glas, pa yega te na top. Pero e dia lo yega cu nos mester subi e lift pa baha bek. Si di berdad nos ta kere den liderasgo femenino, nos mester percura pa e momento cu nos baha for di e lift ey, tin filanan largo di hende muhe pa subi e lift pa bai na top. Pesey nos mester prepara e siguiente generacion di hende muhe pa lidera nos pais.
Y finalmente, mi kier duna un conseho. Nos cada un tin nos luz cu ta briya desde nos interior. No paga luz di otronan, keriendo cu di bo lo briya mas. Tin suficiente luga den henter universo pa nos tur briya nos luz, y pa yuda esnan cu mester di mas claridad.
Mi ta convenci cu pa un miho Aruba, nos mester mas lidernan femenino. Mi ta sumamente orguyoso di por tabata e prome hende muhe den ocupa e posicion di Minister President, y mi lo percura pa mi no ta e ultimo.
