Oranjestad, 6 di maart, 2025 – Cas di Cultura, Aruba su centro cultural nacional di teatro y educacion cultural desde 1958, a revela oficialmente su proyecto di renobacion tan anticipa, ‘E Brasa’, durante un rueda di prensa exclusivo cu a tuma luga den su auditorio. Invitadonan y prensa tabata e promenan pa presencia e plannan ambisioso pa modernisa y expande e institucion cultural principal di e isla, mientras ta conserva su fachada y escenario historico. A gradici Minister demicionario di Finansa y Cultura sra. Xiomara Maduro pa a confia den e proyecto y wak e balor di e plan pa Aruba. A anuncia tambe e prome fase di renovacion cu lo cu lo regarda e parti meymey, esta monumental di e edificio. E evento tambe a estrena di e video di crowdfunding di Cas di Cultura, primordialmente pa e mercado Hulandes cu lo circula via e plataforma Voordekunst pa stimula Arubiano na Hulanda y amantenan di Aruba pa tambe contribui na e causa bunita aki. Na Aruba tambe lo tin un periodo di 6 luna di recaudamento di fondo cu lo termina den un evento publico na september.
E motivacion tras di e renobacion aki ta profundamente ancra den crecemento y sostenibilidad cultural di Aruba. E renovacion lo sirbi pa stimula e industria creativo local door di modernisa e teatro y e resto di edificio, sigurando cu e ta sirbi e actornan, artistanan, y profesionalnan cultural di Aruba di un manera mas al dia y moderno. E transformacion lo contribui na e desaroyo continuo di e sector creativo riba e isla. Un otro aspecto clave di e renobacion ta e mehoracion di e programacion educativo. Door di fortalese partnershipnan cu institutonan educativo, Cas di Cultura tin como meta pa amplia oportunidadnan di siñamento y trece variacion mas grandi na educacion di arte y cultura di Aruba. Adicionalmente, e renobacion lo atende e aspectonan logistico, infrastructural y tecnico anticua di e teatro, treciendo mehoracion cu sostenibilidad den mente.
Durante e rueda di prensa, e liña di tempo di renobacion a wordo mustra, cuminsando desde e campaña di recauda fondo, fase 1 te cu e reapertura. Fase 1 lo enfoca riba un renobacion di e seccion monumental di e edificio cual lo mehora e experencia di e publico y mehora e capacidad tecnico di e facilidad. Na 2026, fase dos lo cuminsa, dunando atencion na e resto di e edificio, cu lo inclui e adicion di un balkon VIP, un tienda di regalo artesanal local, mercancia di Cas di Cultura y ticket pa show, un cafe cu terasa den un ambiente relaha, un expancion di e sala di exposicion y camerino y por ultimo un espacio di evento den aire liber. E gran reapertura di Cas di Cultura completamente transforma ta fiha pa 2028, marcando e comienso di un era nobo pa e escena cultural di Aruba.
Cas di Cultura ya caba a sigura partnershipnan y sponsornan fuerte pa sostene e proyecto ambicioso aki. Gobierno di Aruba, het Cultuurfonds Hulanda, Water- en Energiebedrijf Aruba (WEB), y Aruba Hotel & Tourism Association (AHATA) tur a compromete pa hunga un rol pa haci ‘E Brasa’ un realidad. Aruba Investment Bank (AIB) a compromete pa sostene e parti importante di maneha e fondonan di renobacion recauda di un manera resposabel y transparente. AIB a bin ta haci esaki pa decada caba di un manera hopi satisfactorio pa varios proyecto grandi na Aruba, incluyendo e JFK Center for Education situa banda di Cas di Cultura. Fuera di e asosiacionnan aki, e publico y negoshinan local tambe ta wordo invita pa contribui. A introduci diferente fluho di donacion pa acomoda tur presupuesto y cartera, sigurando cu tur hende cu ta balora herencia cultural di Aruba por hunga un rol den e transformacion aki. Di e cartera mas chikito cu un donacion di algun florin, te na e nivel di laga un legado atras cu contribucionnan mas grandi, cual ta ideal pa e aspecto di mercadeo pa empresanan, marcanan, pero tambe pa nombernan di famia cu kier pa nan sosten ta visto, como mecenas o patron di arte, anke por ta anonimo tambe. Tur contribucion ta conta, pasobra Cas di Cultura ta di nos tur.
E costo total proyecta pa e renobacion completo ta AWG 17 miyon y a mustra con e presupuesto aki ta hinca den otro, calcula varios biaha y pa varios experto. E apoyo di AWG 4 miyon na financiamento di gobierno anterior ta sirbi como fundacion pa e proyecto. Esfuersonan adicional pa recauda fondo, patrosinionan y contribucionnan di comunidad lo ta esencial pa trese E Brasa na finalisacion.
E renobacion aki ta tocante mas cu djis modernisacion. E ta un compromiso pa conserva herencia cultural di Aruba pa futuro generacionnan. Cas di Cultura ta e curason di exprecion artistico riba e isla pa mas cu seis decada, ofresiendo un plataforma pa talento lokal por crece y pa e comunidad por ta envolvi cu arte y nan identidad. Invertiendo den e proyecto aki, Aruba ta sigura un parti di su herencia cultural y su autenticidad. E sector cultural por sigui prospera door cu artistanan tin un escenario pa mustra nan talentonan y e legado artistico di Aruba ta wordo honra. E restauracion y ampliacion di Cas di Cultura ta un paso critico pa reenforsa e poder colectivo di nos comunidad cual ta forma nos identidad nacional. Cas di Cultura ta netamente pa y di Aruba su pueblo y nos pueblo merece un lugar bunita di expresion cu ta p’e y di dje.
Pa mas informacion riba ‘E Brasa’ y con pa sostene e iniciativa aki por bishita www.casdicultura.aw of sigui Cas di Cultura riba medionan social.
Tocante Cas di Cultura
Establece na 1958, Cas di Cultura ta e centro nacional di teater y cultura di Aruba, dedica na promove e artenan di escenario, educacion y exprecion creativo. Como e isla su escenario principal pa teatro, musica, baile y eventonan di comunidad, e ta provee un plataforma pa artistanan local, mientras e ta anfitrion di presentacionnan internacional. Cu un mision pa inspira y conecta pa medio di cultura, Cas di Cultura ta sigui ta un institucion vital den e paisahe artistico y educativo di Aruba.
