Recientemente, Ministerio di Transporte, Integridad, Naturalesa y Asuntonan di Adulto Mayor conhuntamente cu Departamento pa Asuntonan di Adulto Mayor (DOZ) a presenta un resumen di e adviesrapport: Inrichting Verpleging en Verzorging (Ouderenzorg) op Aruba. E rapport aki a wordo traha door di AAG Financial Services bou di guia di sra. Alida de Jong. E punto di salida di e rapport ta cu gobierno tin di prercura pa e cuido di adultonan mayor di Aruba ta di bon calidad, pagabel y accesibel.
Actualmente 18,9% di e poblacion di Aruba ta 65 aña of mas, 13,3% tin por lo menos 1 limitacion, 10% mester di ayudo cu trabao di cas of cuido personal, 5,1% ta den mal/hopi mal estado di salud, 2,4% ta biba den un cas di cuido y 150 persona ta riba e lista di espera di SABA. Teniendo na cuenta cu e poblacion di Aruba ta pasando door di un periodo di embehecemento, e ta sumamento importante pa haya un bista di e costonan relata na e cuido di nos adultonan mayor. No solamente a calcula e costonan actual, pero tambe a haci un proyeccion di e desaroyo di e costonan te cu aña 2040.
Pa haci e calculacion di e costonan di cuido a tene na cuenta 3 factor:
- E cantidad di personanan cu tin necesidad di cuido.
- E tipo y intensidad di cuido cu personanan tin mester di dje.
- E costonan di personal, vivienda y inventario relata na e cuido pa adulto mayor.
E resultadonan di e calculacionnan haci a indica cu pa aña 2025 un total di 2.825 persona mester di cuido, di cual 2.160 persona (76%) lo mester di cuido na cas y 665 persona (24%) lo mester di cuido den un cas di cuido. Den 15 aña di tempo, e cantidad di personanan cu mester di cuido lo aumenta cu 87% na un total di 5.276 persona.
A base di e cantidad di persona cu mester di cuido y e costonan relata na e tipo di cuido cu nan tin mester, a calcula cu na 2025 e costo total lo suma na 102,9 miyon florin. Maske e cantidad di persona cu mester di cuido den un cas di cuido ta casi 3 biaha menos cu e cantidad di persona cu mester di cuido na cas, e cuido den un cas di cuido ta mas costoso cu e cuido na cas, esta 58,6 miyon compara cu 44,3 miyon florin.
Pa e motibo aki a traha 2 scenario den cual a calcula e costo total di e cuido si logra pa baha e cantidad di persona cu mester cuido den un cas di cuido cu 50% of 75%. E resultadonan di e scenarionan aki a indica claramente cu un reduccion di e cantidad di personanan cu mester cuido den un cas di cuido lo significa un reduccion substancial di e costo total di cuido. Un reduccion di 75% di e cantidad di personanan cu mester di cuido den un cas di cuido lo nifica un reduccion di costo di 47% pa 2040.
Pa conclui, e resultadonan di e rapport a indica cu pa e sostenibilidad financiero di e cuido pa adultonan mayor, e ta crucial pa trece cambionan structural pa e cuido pa nos adultonan mayor por wordo duna lo mas posibel na cas.
