Aruba Tourism Authority (A.T.A.) ta mira atras riba su participacion integral den e temporada di Carnaval 2025, brindando sosten pa eleva e nivel di e experiencia pa tanto e comunidad local como nos huespednan. Manera añanan anterior, A.T.A. orguyosamente a brinda su apoyo na SMAC como e organo cu ta organisa Carnaval den su totalidad y ta crea eventonan vibrante y dinamico durante henter e temporada di Carnaval. Alabes, a duna sosten na Stichting MUSICA, un fundacion cu ta promove e desaroyo di talento musical local y asegura cu e enfasis riba nos musica y ritmo di Carnaval ta keda uno presente y relevante.
Como iniciativa di A.T.A., Ban Serio! a conta cu un campaña dinamico cu a centralisa riba un impacto positivo colectivo. Cu e lema di “Laga Nada Atras, Djis Bon Vibra”, a percura pa enfoca riba creacion di conscientisacion durante Carnaval 71, motivando tur participante y espectador pa disfruta di e temporada na un manera responsabel y den harmonia. E campaña a enfatisa riba e importancia di respet mutuo, reconoce impacto propio, seguridad, y inclusion. Orguyosamente reforsando e rol di nos comunidad como e anfitrion cu ta carga y celebra un experiencia inolvidabel pa nos mes y pa tur hende cu ta bira parti di nos tradicion cultural.
Un otro punto sobresaliente den e temporada di Carnaval 71 a wordo refleha den e proyecto di Musica di Brass Band, esta Asambeho. Un proyecto cu a conta cu un colaboracion excepcional entre A.T.A., GoCultura Foundation, Massive Brass Band International, y Elite Productions Aruba. E cobertura di Asambeho a logra capta e esencia y profundidad di nos Carnaval, resaltando su raiz historico-cultural y e impacto importante den preservacion y con nos ta transmiti e patrimonio di nos isla. Pa e motibo aki, a tuma e oportunidad y occasion pa gradici y reconoce Massive Brass Band International cu a percura pa mantene e musica di Brass Band na un nivel halto tanto local como internacional, y pa su continuo aporte na e tradicion unico di Aruba. Cu mescla di contenido audiovisual, fotografia y relato autentico, a percura pa crea un documentacion magistral di Asambeho cu ta sirbi tanto pa nos comunidad local como pa nos audiencia internacional, poniendo enfasis riba e balor unico di nos cultura carnavalesco. www.aruba.com
E apoyo continuo di nos Carnaval como un evento cultural y tradicional, ta un refleho di tur locual ta haci Aruba un destinacion eleva. A.T.A. ta continua cu su dedicacion na sigui traha hunto cu socionan den e Culture & Creative Industry, y hunto cu e comunidad local, pa sigui promove y preserva e caracter autentico di nos isla. Asegurando cu cada experiencia ta keda graba den curason di nos comunidad y nos huespednan.
A.T.A. ta gradici tur socio cu den un manera of otro a contribui cu e periodo di Carnaval 71, na nos ekipo di A.T.A., boluntarionan, y otro organisacionan. Masha pabien cu un otro temporada exitoso, vibrante, y magestral di nos dushi Carnaval.
