Colega Leonides Geerman, asistent di dokter na poli di medicina interno, a hay’e straño cu diripente tabatin un cita y cu su manager mes a dune lift pa hunto nan bay. Manera semper pa tur ocasion, e departamento a decora pa dia di San Valentin, pero e biaha aki tras di su lomba a decora specialmente pe tambe. Asina cu ela pasa e decoracion di San Valentin y ela drenta e sala di reunion ela topa cu un sala yen di colega, famia, specialista y miembro di Hunta di Directiva Jacco Vroegop cu e grito ‘surprise’. Un ‘shock’ grandi pero bunita cu e no a spera y sigur cu nunca elo lubida.
Leonie ta un colega masha profesional cu no solamente ta yuda pashentnan pero tambe ta yuda e dokternan den diferente forma. E ta yuda nan cu traduccion, den duna medicamento, ta maneha administracion y ta asisti na diferente actividad extra-curricular. Leonie ta un tremendo teamplayer cu ta traha cu tur hende sigurando cu e procesonan ta cana suave. E ta stima su trabou, tin comprension pe pashentnan percurando cu nan ta wordo scucha y contesta sea telefonicamente, via Whatsapp, email of na balie. Su manera di trata pashent ta duna nan confiansa. E no ta husga y ta crea un ambiente unda pashent y tambe colega ta sinti nan mes sigur unda por expresa preocupacionnan na un manera trankil. Su accesibilidad y confiansa ta un ‘yabi’ esencial den e team.
Nada ta dimas pa Leonie. E ta un persona practico y eficiente, tin semper su tareanan cla den e tempo stipula y netjes regla. E ta traha duro y ta bay ‘the extra mile’ pa sigura cu su servicio di asistencia pa pashentnan y dokternan ta optimal. Ademas, Leonie ta un atleta talentoso cu ta duna un imagen saludabel y positivo ne policlinica unda cu su estilo di bida deportivo ta contribui ne ambiente di energia y vitalidad na trabou.
Su motivacion y dedicacion ta un ehempel pa tur. Leonie merece e reconocemento aki, paso sin dje, e policlinica no lo draai mesun eficiente. Hunta di Directiva, management y coleganan ta hopi contento y orguyoso di tin Leonie den team di HOH. Masha pabien cu e bunita titulo di empleado di luna di februari 2025!
