ORANJESTAD – Awe mainta Corte di Husticia a trata e caso penal cu Ministerio Publico tin contra Benny Sevinger. E caso ta relaciona cu labamento di placa den caso Avestruz.
ARUBA NATIVE por a compronde cu Fiscal a baha pisa riba Benny Sevinger exigiendo pa Sevinger paga cu 901 mil florin of sino e lo bay sera pa 3 aña. Benny Sevinger a reclama cu esaki ta persecusion politico.
LABAMENTO DI PLACA
Awe mainta Hues a repasa informacionnan di e raport financiero presenta pa Fiscal. Hues a papia cu Sevinger riba e hypoteca cu Sevinger a pidi pa construccion di su cas. Hues a mustra cu segun e raport, e construccion ta mucho mas caro cu e hypoteca. Hues a puntra Sevinger, con el a paga e construccion. Sevinger a bisa Hues cu e resto di placa tabata e placanan cu el a spaar durante su trayectoria como Parlamentario y Minister.
Hues a menciona e compania HSH cu Sevinger tabatin hunto cu S. y H. Hues a mustra cu Sevinger a cumpra accion di S. Segun Sevinger, na dado momento S. kier a sali y e y H. a cumpra e accionnan.
MALVERSA PLACA DI VIAHE DI TRABAO
Hues a mustra riba e placanan cu Sevinger tabata haya pa haci viahenan di trabao. Hues a bisa cu Sevinger a wordo haya culpabel di a malversa placanan di viahe. Hues a mustra cu te cu November 2014, Parlamentarionan y Ministernan tabata haya placa cash. Sevinger a presenta un raport financiero pa contradeci esun di Fiscal. Den e raport, Sevinger ta mustra cu e tabata spaar e placanan di viahe y no tabata malversa. Hues tabata kier splicacion riba esaki. Sevinger a splica Hues cu tin biaha e ta usa su credit card durante e viahe y ta laga e cash di viahe na cas. El a bisa cu e no ta gusta bay banco y tabata warda placa na cas. Hues a remarca cu si no tin informacion di banco, e ora ey no tin prueba di loke Sevinger ta splica. Sevinger a remarca na Hues cu si e tabata esey, e lo a haci’e pa tin pruebanan. Hues bisa cu Fiscal no ta kere cu Sevinger por a spaar asina hopi placa. Hues a bisa cu Fiscal den e raport ta mustra cu Sevinger a haci viahe cu su famia y tabata haci gastonan grandi. Sevinger a reacciona cu tur esaki ta politiqueria pa hustifica Fiscal su acusacion. Sevinger a bisa Hues cu ora e viaha cu vacacion, e sa cumpra hopi cosnan pa hendenan cu ta pidi’e. Hues a bisa cu e ta compronde pero tin potret di Sevinger cu famia na Italia cu ta mustra cu ta costoso. Sevinger a bisa cu na Italia tabata e unico lugar cu el a come ice cream asina caro. El a bisa cu el a paga 40 Euro pa 2 ice cream. Hues a remarca cu esey ta mustra cu Sevinger tabatin placa cun’e.
BENDE DOS PERCELA PA MAS DI 108 MIL FLORIN
Hues a mustra cu segun e raport financiero di Fiscal, na 2005, Sevinger a bende dos tereno. Segun Sevinger ta di su tata. Hues a mustra cu nan a wordo bendi mas cu 108 mil florin. Esaki a wordo paga cash. Sevinger a bisa cu e pagamento tabata den terminonan cu a dura hopi aña. Hues a puntra kico Sevinger a haci cu e placa aki. Segun Sevinger, e ta kere cu gran parti di e placa a bay den construccion di su cas. Hues a remarca cu segun e raport di Notario, e placa a wordo paga cash y no den termino manera Sevinger ta bisa. El a puntra Sevinger si e tin buki con e persona a paga, Sevinger a bisa cu e no tin buki.
FISCAL A EXIGI PA BENNY PAGO MAS CU 901 MIL FLORIN
Fiscal a bisa Hues cu e gym na cas di Benny, ta worde considera un regalo di Sussebeek y tambe e frishidaire. Na opinion di Fiscal, no tin indicacion cu Benny lo a paga pa esakinan. El a mustra cu Hof a mustra cu Benny a malversa placanan di viahe pa trabao como Minister. Fiscal a mustra cu ora expertonan ta haci e calculacionnan, ta bay for di sumanan cu lo mester tin pa por haci gastonan. Si no tin factura di pago y no tin splicacion di gastonan, ta keda cu a usa placanan sin tin splicacion. Fiscal a mustra cu Benny a cumpra cas na Colombia. Tambe el a mustra riba e acta Notarial cu ta mustra cu Benny a bende e terenonan cash.
Fiscal a exigi pa Benny paga mas di 901 mil florin y si Benny no paga, e lo mester bay 3 aña sera den prison.
ABOGADO
Mr. Kock a bisa Hues cu actualmente Benny ta den Corte di Casacion na Hulanda. E abogado a mustra cu Fiscal ta haci exigencia como si fuera cu ya tin un sentencia contra Benny. Na opinion di mr. Kock, ainda Benny no ta sentencia. E ta haya cu e decision di Casacion lo por ta beneficioso pa Benny. Mr. Kock a bisa Hues cu e ta haya straño cu Fiscal a cuminsa e proceso di kita propiedadnan siendo cu ainda no tin un decision di Casacion. Na opinion di mr. Kock, esaki ta trece cune cu por bien ta cu Benny lo apela e decision di e caso aki y bay Corte Superior. E abogado ta haya cu lo ta mihor pa pospone e caso te ora tin un decision di Corte di Casacion. Hues a puntra e abogado si mester tin decision awor riba e peticion. Abogado mr. Kock a bisa cu mihor Hues tuma un decision te den su sentencia y asina tin tur tempo pa evalua e caso. E abogado a mustra cu Benny tabata lanta placa for di banco y tabata paga pa construccion di su cas. E abogado ta haya cu Benny ta hopi concreto con el a usa su placa pero Fiscal ta bisa cu tin un raport di taxaccion cu ta mustra cu e balor ta mucho mas. E abogado ta haya cu esaki ta inhusto.
Pa loke ta e gastonan di viahe di trabao, e abogado a bisa cu ta hopi placa a wordo paga na e ministernan. Na opinion di abogado, Fiscal mes ta papia cu mas di 500 dia Benny tabata den exterior. E abogado a bisa Hues cu un gran parti di e placa aki, Benny a tene y a usa su credit card. E abogado ta haya cu e calculacion di Fiscal no ta cuadra. E abogado a bisa cu ta e asunto aki tambe ta wordo evalua den Casacion y e ta haya cu ta mucho prematuro cu e caso aki. E abogado a remarca cu Fiscal ta bisa cu no tin prueba di entrada legal. E abogado ta haya cu ta un hecho cu Benny a haya e placanan. E abogado a pidi Hues pa pospone e caso of dicidi cu ta rechaza e demanda di Fiscal.
BENNY TA HAYA CU PERSECUSION POLITICO A KIBR’E
Benny a bisa Hues cu durante 30 aña el a traha riba su cas. Asina el a siña di su mayornan pa traha su cas. Cu wowo yen di awa el a bisa cu e no por accepta cu Fiscal ta bisa cu el a haya 901 mil florin. El a bisa Hues cu e no sa kico e ta bay haci. E no sa kico su futuro ta.
Benny a expresa cu Fiscal por bisa kico e kier pero e ta kere cu pa motibonan politico, el a wordo persigui. Benny a expresa cu tur esaki ta persecusion politico. El a para riba cu e no a haya placa for di ningun hende y no ta haya cu e mester haya castigo. El a bisa Hues cu e lo sigui bringa y un dia e berdad lo sali na cla. Hues a sera tratamento di e caso y a bisa cu dia 3 April 2025 lo tin sentencia.
