ELMAR: Tene distancia di liña di coriente den caso di accidente di auto involviendo palo di luz

Oranjestad – 28 februari 2025 – ELMAR ta enfatisa e importancia di seguridad den caso di un accidente di auto involviendo un poste di coriente afectando liñanan di coriente. Si un vehiculo accidenta riba un palo di luz y liñanan di coriente cay, e situacion por ta extremadamente peligroso y fatal. E comunicado aki ta pa e comunidad henter, incluyendo first responders di accidentenan.
Den caso di un accidente afectando liñanan di coriente, ta crucial pa sigui e siguiente reglanan di seguridad:
● Mantene un distancia di 15 meter pa sigura cu bo ta den e zona di seguridad, no cana den cercania di liñanan di coriente, den situacionnan di accidente di auto cu liñanan di coriente a cay. Un coriente di voltahe halto por bula y dal bo, sin cu bo a mishi cu e liña di coriente. Laga ELMAR yega na e sitio di accidente y confirma cu e liña di coriente ta desactiva.
● Tanten cu no ta confirmacion cu e liña di coriente ta desactiva, y bo mira un persona den peliger den cercania di liñanan di coriente, no tuma ningun riesgo pa trata di yuda e persona, esaki por causa peliger fatal si e liña di coriente ta activo.
● No sali for di bo vehiculo si bo vehiculo tin contacto cu liña di coriente. E liña di coriente por ta activo y por trece consecuencianan fatal.
● Den caso cu bo mester sali for di e vehiculo pa motibonan di peliger, por ehempel vehiculo ta na candela, sali pafo di e vehiculo cu dos pia pareu y cu bo mannan cerca di bo curpa. E ta importante pa no mishi e vehiculo (ningun parti metal) y tera na mesun momento (incluyendo bo paña), ora di sali for di vehiculo. Asina cu sali for di vehiculo, dal pasonan chikito te ora cu yega un distancia di 15 meter for di e liña di coriente y e auto pa drenta den zona di seguridad. Si e liñanan di coriente ta activo, esaki por causa peliger fatal.
Den caso di un accidente involviendo un palo di luz, yama 911 inmediatamente pa raporta e situacion y informa cu liñanan di coriente a cay debi na e accidente di auto involviendo palo di luz, y warda asistencia di autoridadnan competente.
Nos ta pidi atencion y prudencia pa evita accidente adicional y pa garantisa seguridad. Si bo tin duda of bo ta enfrenta cu un situacion di emergencia relaciona cu liña di coriente, tuma contacto inmediato cu ELMAR su Storingsdienst na 523-7147.
Laga nos proteha nos mes y nos comunidad cu responsabilidad y cu bon informacion.