Mester entrega e listanan via e portal ‘BO impuesto’
ORANJESTAD – Departamento di Impuesto ta informa cu dia 31 di maart 2025 ta ultimo dia pa entrega e lista colectivo di salario (verzamelloonstaat of VZL) y e lista colectivo di pago na tercera persona (verzamelstaat opgaaf derden of VOD) di aña 2024. Tur doño di trabou of comerciante mester entrega e listanan menciona den forma digital via e portal ‘BO impuesto’ (BOi) di Departamento di Impuesto. Den e dianan venidero e doñonan di trabou of comerciantenan lo ricibi un e-mail cu informacion relevante encuanto VZL y VOD.
Entrega den forma digital
Tanto e ‘Verzamelloonstaat’ (of VZL) como e ‘Verzamelstaat opgaaf derden’ (of VOD) di aña 2024 ta disponibel den e portal ‘BO impuesto’. E doño di trabou of comerciante por yena e datonan na man den e portal mes of por scoge pa upload e XML-file, cu ta wordo produci door di su programa di payroll. Alabes tin e opcion pa uza e MS Excel filenan di Departamento di Impuesto cu yama “e-Verzamelloonstaat” y “e Verzamelstaat Opgaaf Derden”. Despues di yena e datonan den e MS Excel file, mester converti esaki den un XML-file pa por upload esaki den e portal BO impuesto.
Por baha e MS Excel filenan via impuesto.aw. Click riba e folder “Loonbelasting” riba e pagina principal; despues click riba Loonbelasting 2024. Ta bon pa tene na cuenta cu no ta posibel mas pa entrega un USB stick of manda e filenan via e-mail. Si tin pregunta con pa genera e XML-file for di e programa di payroll, mester tuma contacto cu e ‘payroll provider’ concerni.
Ahustacion di e datonan
Despues di entrega (submit) e datonan di e VZL of VOD via e portal BOi y a ripara cu mester haci ahustacion den e datonan, esaki ta posibel. Den e caso aki, mester traha un XML-file completo, pues inclui tur dato di nobo. E comerciante of doño di trabou ta haci e ahustacionnan prome den e programa di payroll of MS Excel file cu el a download di e website di Departament di Impuesto. Na final ta converti e datonan den un XML-file. Despues ta bay den e portal y via ‘History’ ta busca e lista di 2024 y click riba e icon di potlood na banda drechi pa habri e documento pa por upload e XML-file nobo.
Por ehempel:
Si e datonan di empleado A no a wordo inclui den e VZL original cu a wordo entrega. E ora mester traha un XML-file di e VZL completamente nobo cu ta inclui e datonan di tur empleado. No ta posibel pa upload e
datonan di empleado A solamente den un XML-file separa y upload esaki. Ta importante pa entrega e VZL completo bek, pues e lista cu ta inclui e datonan di tur empleado. Mesun procedura ta conta tambe pa e VOD.
Si e comerciante of doño di trabou no a upload un XML-file pero el a yena e datonan directamente den e portal, e por haci ahustacion tambe. Pa esaki e ta habri e documento via ‘History’ y ta inclui e datonan cu e falta y submit e lista completo bek.
Registra como usuario di e portal
Si un doño di trabou of comerciante no ta registra como usuario di e portal BOi, lo mester haci esaki online mas lihe posibel. Pa esaki ta bishita www.impuesto.aw. Riba e pagina principal, ta click riba ‘Digitale formulieren’ y despues ta scoge e opcion ‘BOi account’ y sigui e instruccionnan.
Si un usuario existente no ta logra log in den e portal, e mes por cambia su password via e pagina di log in di BOi. E ta scoge ‘Password vergeten’ of ‘Wijzig password’ y sigui e instruccionnan. Si acaso no ta logra, e usuario por manda un e-mail na [email protected] of yama 522 7423 of 522 7424.
Fecha final
E fecha final pa entrega e listanan di VOD y VZL ta 31 di maart 2025.
No tin prolongacion di termino
Departamento di Impuesto ta conseha tur contribuyente pa cumpli na tempo debi cu no ta bay tin prolongacion di termino. Keda sin entrega e ‘Verzamelloonstaat’ of e ‘Verzamelstaat opgaaf derden’ di aña 2023 lo por nifica cu e contribuyente lo por ricibi un cobransa adicional (naheffingsaanslag) inclui boet di Afl. 10.000 maximo.
Pa mas informacion tocante verzamelloonstaat y/of verzamelstaat opgaaf derden por consulta e website www.impuesto.aw via e siguiente linknan:
https://www.impuesto.aw/verzamelloonstaat-vzl/
https://www.impuesto.aw/verzamelstaat-opgaaf-derden-vod
