IDOOR and Others ta un buki tocante e historia rico di aviacion di Aruba
Oranjestad- Aruba Airport Authority N.V. (AAA) ta orguyoso di celebra lansamento di e buki IDOOR and Others: Aruba’s Aviation History 1923-1950, skirbi p’e experto di aviacion Mauricio Boekhoudt, IAP. E publicacion aki ta pone luz riba e historia rico y fascinante di aviacion na Aruba, for di su prome dianan na aña 1923 te cu e desaroyo di e isla como un centro clave di aviacion den Antia Hulandes.
Mauricio Boekhoudt a dedica mas cu 45 aña na e industria di aviacion, cuminsando su carera como controlado di trafico aereo na Aeropuerto di Aruba y despues a fungi como consehero strategico na AAA. Pa medio di investigacion extenso, el a reconoce un buraco den e historia documenta di aviacion na Aruba, cu a hib’e pa embarca riba un trayecto pa conserva e herencia unico aki. E resultado ta un relato profundo di e evolucion di aviacion di Aruba, incluyendo e prome pistanan di aterisahe di e isla situa na Savaneta, e establecimento di servicionan di vuelo comercial, y e rol influyente di Aruba den biahe aereo regional y transatlantico.
Aeropuerto di Aruba ta honra di por a sostene e proyecto importante aki den documentacion di e historia di Aviacion di Aruba. Como parti di e celebracion, AAA a organisa un evento exclusivo di firmamento di buki unda cu e empleadonan a haya e oportunidad unico pa conoce Mauricio Boekhoudt y haya nan copia di buki firma personalmente pa e autor. E iniciativa aki ta refleha e compromiso di AAA pa conserva y promove e herencia di aviacion di nos isla, mientras ta fomenta un conexion mas profundo entre su empleadonan y e historia di nan industria.
“Den nomber di Aruba Airport Authority, nos ta gradici Mauricio Boekhoudt sinceramente pa su dedicacion pa documenta e historia di aviacion. Su trabou ta significativo den preserva e storia y logronan cu a forma nos industria, sigurando cu e futuro generacionnan por aprecia y siña di nan”, asina Jurgen Benschop, Chief Operating Officer y Barbara Brown, Chief Revenue Development & Communications Officer na Aeropuerto di Aruba a bisa durante e evento. “Nos ta aprecia su contribucion di berdad y ta ansioso pa e impacto cu su buki lo tin riba amantenan di aviacion y e profesionalnan.”
E publicacion “IDOOR and Others: Aruba’s Aviation History 1923-1950” ta marca un contribucion grandi na e archivonan historico di Aruba y ta sirbi como un recurso educativo pa e futuro generacionnan. Aeropuerto di Aruba ta felicita Mauricio Boekhoudt cu e logro aki y ta spera di por sigui celebra e herencia di aviacion di Aruba. E buki “IDOOR and Others” ta obtenibel na Plaza Bookshop Aruba.
Tocante AUA Airport Tocante AUA Airport AUA Airport ta un di e aeropuertonan mas ocupa den region Caribe, cu mas di 25 diferente aerolinea operando na Aruba contribuyendo na casi 3 miyon pasahero pa aña y brindando
servicio aereo na 31 pais y 45 destinacion non-stop rond mundo. Di e mercadonan cu AUA Airport ta brinda servicio na dje, 76% ta di Merca y Canada, 16% ta di Latino America, 5% ta di Europa y 4% ta di Caribe Hulandes. AUA Airport ta reconoce cu esaki ta danki na un economia stabiel, clima politico, hospitalidad, populacion diversifica y siguridad general di nos isla. AUA Airport su aspiracion ta pa converti den un di e aeropuertonan mas sostenibel, sigur y prepara pa futuro den e region di Latino America y Caribe, brindando un espacio laboral confiabel, cu e instalacionnan moderno y ademas cu un excelente servicio n’e cliente p’asina por refleha e hospitalidad di Aruba, contribuyendo na un futuro prospero pa Aruba.
Haya sa mas di loke ta pasando na AUA Airport door di bishita www.airportaruba.com y conecta cu AUA Airport riba Twitter.com/Aruba_Airport, Facebook.com/ArubaAirport, Instagram.com/arubaairport, TikTok.com/@arubaairport y Linkedin.com/ArubaAirport.
