E delegacion di Aruba cual a consisti di Aruba Tourism Authority y Aruba Airport Authority, durante e recien conferencia di ANATO, a tuma parti den reunionnan fructifero cu aerolineanan mayor cu ta conecta Aruba cu Colombia y Latino America. Aerolinea manera Avianca, Copa, Wingo y GOL tabata e enfoke di reunionan pa reforsa e relacion existente y explora oportunidadnan nobo pa un colaboracion continuo.
Colaboracion cu Wingo
Durante combersacion cu aerolinea Wingo, Vicepresidente di venta y distribucion Jorge Jiménez, hunto cu otro ehecutivonan clave, a expresa nan compromiso pa crecemento y desaroyo continuo di sector di biahe aereo di Aruba. Logronan significante a wordo nota, incluyendo e rol pivotal di Wingo cu ta percura pa trece un total notabel di 38% di biaheronan Colombiano pa Aruba. Alabes, e mercado di Wingo ta conta cu un crecemento remarcabel, for di 3% na 2019 pa un impresionante 16% na 2023. Mester nota cu strategia di Aruba ta pa stabilisa e mercado di turismo di Colombia y crece otro mercadonan.
Avianca ta Afirma Relacion cu Aruba
Reunionnan cu Avianca a subraya e relacion duradero entre e aerolinea y Aruba, mirando cu ta conta cu un relacion impresionante di 68 aña. Ehecutivonan di Avianca ta aplaudi e desempeño exepcional di Aruba como socio di destinacion, demostrando resultadonan ehemplar y esfuersonan colaborativo. A enfoca pa reforsa strategianan pa expande den mercadonan leu, conocí como ‘long-haul markets’, cu enfasis particular riba ciudadnan importante manera Argentina, Chile, Brazil, y Peru. A papia di ampliacion di servicio aereo pa asina amplia e “market share” di Latino America como parti di e total di huespetnan cu ta bishita Aruba, pensando aki riba e papel clave cu Avianca ta hunga den trece esnan di entre otro Brasil, Argentina, y Chile.
Actualmente 40% di tur Latino Americano ta yega Aruba via Avianca Airlines. Ta di menciona cu 50% di e aerolinea ta mobiliza e mercadonan di ‘Long-haul’, manera Argentina, Brasil, Chile, Perú, Ecuador, Paraguay, y Uruguay. Durante 2023, un averahe di 63.426 bishitante a pasa via Bogota pa yega Aruba. Avianca actualmente ta ofrece 11 vuelo semanal via Bogota, teniendo na cuenta cu entrante 2 di juni lo cuminsa cu 3 vuelo adicional semanalmente. Esaki ta nifica cu Avianca lo yega un total di 14 vuelo semanal pa Aruba via bogota y na mesun momento manteniendo durante temporada halto e ruta di Medellín cu 3 frecuencia semanal, logrando asina e cantidad di mas halto den historia di Avianca pa Aruba.
Colaboracion cu Copa Airlines ta continua
E compromiso di Aruba cu Copa Airlines ta reafirmacion mutuo pa reforsa e relacion actual y maximalisa e oportunidadnan pa crecemento. Factornan di carga positivo y aumento di frequencia a subraya e desempeño robusto di conectividad di Aruba via Panama. Ehecutivonan di Copa Airlines a enfatisa riba e importancia den mantene un relacion estrecho entre e aerolinea y Aruba pa alcansa exito mutuo, enfatizando riba un strategia vital pa un colaboracion duradero.
Durante 2023, e ciudad di Panama cu ta e hub di Copa Airlines, a conta cu un averahe di 40 mil bishitante for di Latino Americano pa Aruba. Copa Airlines ta e di dos aerolinea di Latino America di mas grandi pa e isla, cu planes pa aumenta e frequencia aereo for di Panama. Actualmente, 84% di e vuelo di Copa Airlines ta conta cu bishitantenan nan cu ta bini Aruba pa vakantie, e resto ta residentenan di Aruba. Copa Airlines ta enfoca principalmente riba bishitantenan di e mercadonan di Argentina, Chile, Peru, Ecuador, Brasil, Paraguay, y Uruguay.
GOL ta satisfecho cu e resultado nan di e promer 3 luna nan
E aerolínea GOL Airlines bouw liderazgo di Fabiola Castanheira a comparti cu e team di Aruba cu nan ta satisfecho con e promer luna nan di e operacion di e vuelo ta desarrollando, teniendo en cuenta cu esaki ta uno relativamente nobo, e ocupacion y demanda pa e ruta ta keda halto. Unda a comparti cu e ocupacion ta un avarahe di 80%. A combersa tambe riba e ruta nan cu ta actualmente conecta, cual ta Argentina (30%) y Brasil (70%) y na unda lo evalua y revisa e posibilidad pa e ruta aki por conecta cu Uruguay tambe, cu tambe ta un mercado di interes pa Aruba. A acorda cu lo sigue monitorea y traha den conhuntamente pa segura cu e ruta sigui duna resultado nan positivo. Ta bon pa menciona cu e mercado di Brasil ta uno cu ta contribui di una manera importante na e gasto (Tourism Receipts).
Cu mira pa futuro
Pa conclui, delegacion di Aruba a finalisa combersacionan productivo cu socionan clave di aerolinea, concretizando socionan existente mientras ta explora posibilidadnan pa otro futuro colaboracion. E compromiso pa mehora conectividad, explora rutanan nobo, y stimula crecemento ta keda firme mientras Aruba ta pone su mes como un destinacion atractivo den Latino America. Aruba Tourism Authority, conhuntamente cu Aruba Airport Authority ta sigue traha hunto pa logra mantene y desaroya un conexion aereo saludabel y sostenible.
