ORANJESTAD. – Diahuebs mainta, Prome Minister Evelyn Wever-Croes tabata presente na e celebracion di e di 181 aniversario di independencia di Republica Dominicana. Prome Minister a indica cu e pueblo aki sigur ta uno cu Aruba ta identifica su mes mirando cu tur dos pais semper a lucha pa nan independencia. Republica Dominicana prome a lucha pa su independencia di Haiti, y despues pa restablece Republica cu e lasonan cu Spaña.
Prome Minister a expresa cu riba e dia importante aki, Aruba no ta solamente celebra e dia di independencia cu e pueblo di Republica Dominicana sino tambe e lasonan cu tin entre Aruba y nan. E lasonan aki a cuminsa di tempo tabata tin e industria di sucu na unda varios Arubiano y Curasoleño a bay biba y traha eynan . Despues a bin e temporada di industria di refineria na Aruba sigui pa turismo na unda hopi ta esnan cu a bin bek pa establece nan mes akinan.
Manera nos libertador Betico Croes semper a bisa; Arubiano no ta solamente esun cu a nace na Aruba sino tambe esun cu a haci di Aruba su hogar, y esaki ta loke Prome Minister a corda cada un di nan durante su discurso e mainta aki.
Prome Minister ta felicita henter e comunidad di Republica Dominicana riba nan dia special y ta gradici cada un di nan cu a laga nan pais y famianan pa bin establece nan mes aki na Aruba. E lasonan cultural cu tin entre Aruba y Republica Dominicana tambe ta uno fuerte y hopi ta custumbernan cu nos a adapta, manera e musica di merengue.
“Mi ta hopi agradeci pa e invitacion y di por ta presente pa celebra e dia special aki cu cada un di bosonan. Pa mi semper ta un honor di por representa, den nomber di Gobierno di Aruba, nos dushi pais Aruba”, Prome Minister a expresa.
