‘Latino America ta sigui ta un region importante’
Cu presencia di delegacionan di Aruba Tourism Authority (A.T.A.) HQ y Latino America, Aruba Airport Authority (AAA) a tene un series di encuentro strategico cu actornan clave den e industria durante participacion na Feria Turistico di ANATO. Conoci como e evento di mas importante di e sector cu a tuma lugar na Colombia. A conta cu un agenda strategico y reunionan importante, caminda cu delegacionan di Aruba cu un total di 15 compania y alrededor di 35 persona a enfoca na consolida posicionamento den e mercado Latino Americano y continua na fortalece laso cu socionan comercial y di aerolinea.
Un agenda enfoca riba relacion y colaboracion
Desde diamars 25 di februari a cuminsa cu reunionan interno di A.T.A. pa revisa resultado nan di 2024, strategia di 2025, update di plan nan cu aerolínea Latino Americano den preparacion pa reunionan importante cu lo tuma lugar durante e siman aki. Alabes, a conta cu encuentro cu operador grandi di Latino America, Despegar, Holland House, cual ta e camara di comercio di Reino Hulandes na Colombia pa un contexto politico y di comercio y e agencia creativo MullenLowe cu ta apoya Aruba posiciona su marca den e region. Ademas, durante e atardi a cumpli cu diferente entrevista cu ehecutivonan principal a traves di medio di comunicacion internacional manera Ladevi, Forbes, y Réport, compartiendo un actualisacion riba strategia y desaroyo di Aruba pa cu 2025 y e siguiente añanan binidero.
Inauguracion y presentacion durante Feria Turistico
Diarason 26 di februari a conta cu inicio oficial di ANATO 2025, cu e presensia di e Presidente di Colombia, Minister di Turismo y entidadnan gubernamental. A cumpli cu inauguracion di e booth di Aruba den Pabilon 17 den presencia di Emabahada Hulandes Marc Hauwert – Deputy Ambassador, director di Holland House Jan Willem Van Bokhoven, representantenan di A.T.A., AAA, Aruba Convention Bureau (ACB), DMC (Destination Management Company), representante di hotelnan local, operador di tour local, cu a inclui cortamento di cinta y entrevista cu medionan local.
Durante e dia, e delegacion ehecutivo di Aruba a cumpli cu reunionan importante cu aerolineanan manera JetSmart, Avianca, Wingo y Copa Airlines. Pa asina fortalece e compromiso cu e conectividad aereo y expancion di ruta pa e isla conforme strategia pa sigui diversifica esnan cu ta bishita. Durante e combersacion nan aki, A.T.A. cu AAA por a comparti cu nos socionan di e crecemento y relevancia importante cu e region Latino America a logra durante e ultimo añanan. Cu un crecemento promedio anual di e ultimo 10 aña nan di 26% y e aportacion directo na e importancia di e strategia di diversificacion, ampliando de tal manera e participacion di e region cu 10.5% durante 2023 pa un 13% den 2024. Tambe a resalta e strategia di diversificacion dentro di e region Latino America, unda A.T.A. conhuntamente cu AAA ta enfocando den posiciona y fortalece e turismo cu ta bini for di mercadonan manera, Argnetina, Brasil, Chile y Peru. Un dato curioso y importante cu e ehecutivo nan di A.T.A. a comparti durante nan presentacion ta e hecho cu 72% di tur huesped Latino durante 2024 a bishita Aruba pa promer biaha, esakinan ta huespednan nobo ta crea unespacio pa ripiti nan bishita den un futuro cercano.
A percura pa comparti estrategianan y proyeccionan di Aruba pa e mercado Colombiano y Latino Americano na 2025, enfocando riba diversificacion di oferta. A resalta riba e progreso den conectividad aereo, cu buelonan directo for di Colombia, Brasil, Chile y Perú, y un aumento di 6% den e yegadanan for di e region den 2024. A amplia riba un Aruba cu lo reforsa su compromiso cu turismo responsabel, promoviendo sostenibilidad y educacion bou di e huespednan aun mas. Tambe, a enfatisa e reconocemento di Aruba den e premionan Travelers’ Choice di TripAdvisor y e expancion di turismo di e segmento di turismo pa gruponan di negoshinan cu ta organisa biahenan como incentivo pa personal y/of socio (negoshi: MICE). A elabora riba e strategia di mercadeo cu ta inclui e consolidacion di e campaña “El Efecto Aruba”, implementacion di herment digital y personalisacion di experencia pa asina por atrae e segmentonan desea di e mercado.
Aruba, un destinacion cu ta keda evoluciona
Cu un proposicion turistico cu ta combina naturalesa, hospitalidad y experiencianan autentico, Aruba ta sigui consolida su mes como e destinacion ideal pa e mercado Latino Americano, unda Aruba ta keda un referente pa otro destino nan y ta wordo elogia di su trabouw den e industria di Turismo. E participacion den ANATO 2025 ta reafirma e compromiso di e isla pa cu inovacion y crecemento sostenibel di turismo.
