ATIA ta un partner importante pa Gobierno
ORANJESTAD – Diaranson mainta 26 di Februari, Prome Minister Evelyn Wever-Croes a reuni cu representantenan di Aruba Trade & Industry Association (ATIA).
Prome Minister ta reuni riba un base regular cu ATIA unda ta trata diferente punto di relevancia pa Gobierno pero principalmente pa ATIA como e gremio di doñonan di trabou.
RAft ingetrokken y otro rijkswet pa baha e interes di e prestamo di covid
Durante e reunion a toca e tema financiero di pais Aruba y riba e RAft cu ya ta for di mesa y riba e negosacionnan andando di e otro rijkswet cu ta trata pa baha e interes di e prestamo di covid. “Manera ya ta conoci e negosacionnan riba esaki ta andando y ta riba bon caminda y na fin di e gobernacion aki e gobierno nobo lo keda cu dos opcion “riba menu”;
Un ta: CU un rijkswet cu interes abou. E e otro ta: SIN rijkswet y un interes halto. Riba esaki ta e gobierno nobo lo bay dicidi”, Prome Minister a accentua
Fondonan di UE tey pa E-Government
Otro tema cu a elabora riba dje ta e E-Government. Esaki ta un tema cu cada bes ta bin dilanti durante e reunionnan c ATIA. Sector priva tin un rol importante den E-Government cual ta e digitalisacion di servicionan di Gobierno. Plannan di esaki ta ambicioso y e fondonan di Union Europeo tey pa e ehecucion pero e exito di e proyecto aki tambe ta depende di e sector priva unda ATIA ta un partner importante.
DIMAS, DPL y DIP
Otro tema cu regularmente ta bin dilanti durante e reunionnan cu ATIA ta e situacion cu tin pa personanan haya permiso di trabou a traves di Dimas y DPL. Tambe a elabora riba e tema di DIP cu a trata tereno comercial. Prome Minister ta indica cu tur e organisacionnan aki tin hopi reto di fluho di trabou y tin atraso den procesonan y esaki ta afecta sector priva y p’esey ta importante pa sigui dialoga riba nan.
ROPV
ROPV ta e ley cu ta regla e ordenansa teritorial di pais Aruba. Esaki ta stipula e parti di Aruba cu ta protegi y asina con ta desaroya e resto di terenonan na Aruba principalmente pa vivienda mirando cu esey ta algo di gran necesidad. Riba esaki Prome Minister a haci un apelacion na ATIA mirando cu nan tin miembronan cu hopi experiencia no solamente den e parti di tereno pero tambe di vivienda. Asina nan lo por yuda Gobierno traha riba solucionnan pa e tema importante di vivienda.
“Mi ta gradici ATIA pa e reunion awe pero tambe pa e mas di 7 aña cu nan tawata un stakeholder importante pa Gobierno di Aruba den toma di decisionnan. Aruba ta den pleno desaroyo, y economicamente y financieramente ta bon para. Pa motibo aki ta importante pa fiha e rumbo di e futuro hunto cu nos partnernan. E relacion cu ATIA semper tawata hopi bon. Nan tin un rol importante representando nan miembronan, mescos cu Gobierno tambe su rol ta importante y semper nos a logra na yega na otro y mi ta gradici ATIA pa esaki”, Prome Minister a expresa.
