Dialuna mainta Parlamento di Aruba na forma unanime a bay de acuerdo cu cambionan den e Ley di Destaho pa Aruba.
Ta trata di cambionan pa haci e Ley nobo di Destaho cu a keda aproba na aña 2019 mas eficiente den practica. Den e cambio di ley cu a keda trata, entre otro, ta introduci un periodo mas cortico di 30 pa 15 dia pa warda prome cu e Minister duna e proyecto, y ta introduci e posibilidad pa na momento cu un destaho faya, por sigui negosha cu partidonan pa yega toch na duna e proyecto, sin cu esaki mester wordo adapta of mester bin un destaho nobo. Banda di esaki tin mas flexibilad den e proceso ora di entrega di documento necesario, locual ta yuda haci e proceso di destaho mas eficaz.
E Ley di Destaho cu a keda aproba na aña 2019 y e cambionan cu Parlamento a aproba awo lo drenta den efecto via un Landsbesluit mas despues. Motibo pa esaki ta cu Gobierno lo bay duna un ronda di informacion amplio pa asina hefe di departamentonan di Gobierno, companianan y comunidad henter por ta bon informa di e reglanan nobo pa destaho cu lo reemplaza e reglanan existente den articulo 25 y 26 di Ley di Comptabilidad y e Landsbesluit Openbare Aanbestedingen.
Una vez aplica, e Ley di Destaho lo trece mas transparencia riba con fondonan publico ta wordo destina den destaho, companianan chikito y mediano lo haya mas oportunidad pa participa na un destaho y tin mas flexibilidad pa haci e destaho mas eficaz.
