Den ora nan di diadomingo marduga 23 di februari, a tuma nota di un boto sospechoso nabegando den direccion di Aruba. Consecuentemente a pidi asistencia di e avion Dash-8 di Wardacosta pa asina por analisa e situacion. Tripulacion di e avion a logra di verifica cu tabata trata di un boto sospechoso y a opta pa inmediatamente alerta personal di Wardacosta na Aruba pa asisti cu e caso. Cu rapidez nan a sali den direccion nort oost di Aruba. Despues di un persecucion intensivo, miembro nan di Wardacosta a logra di intercepta e boto, tipo pinero, cu un total di 4 persona abordo. Tur 4 tripulante, hende homber, ta di nacionalidad Venezolano. Riba e lancha a bin topa cu un cantidad grandi di bulto cu narcotica den nan. A confisca aproximadamente 550 kilo di droga. Tur e personanan nan riba e boto y tambe e pakete nan di droga a ser entrega na personal di KPA y mientras tanto a destrui tur droga.
