Marca e fecha: Diadomingo 30 di maart 2025
ORANJESTAD (25 di maart 2025) – E momento spera a yega e siman aki caminda Rotary Club of Aruba a anuncia e fecha di su grandioso Fiesta Rotaria. Preparacionnan ta andando di algun tempo caba y ta asina leu cu por comparti cu un y tur pa marca e fecha di 30 di maart 2025. E diadomingo aki, un biaha mas lo tin e feria di articulo, cuminda y diversion di mas grandi riba e isla tumando luga riba parkeerplaats di Stadion Guillermo Prospero Trinidad na Dakota.
Directiva di Rotary Club of Aruba den persona di su presidente actual, Diego Acevedo hunto cu Bert Kamsteeg cu presidi e Comite Organisado di Fiesta Rotaria, ademas di Relacionista Publico di e club, Shelby Maduro, a topa cu prensa diamars mainta na stadion caminda a comparti varios detaye di e evento, ademas di e invitacion na comunidad di Aruba pa asisti y aporta.
Pasando bon ta brinda e oportunidad tambe na e pueblo di Aruba di yuda recauda fondo cu despues e club ta distribui bek na diferente proyecto social; entre nan diferente iniciativa cu ta beneficia esunnan cu mas necesidad, manera adulto mayor y mucha, entre otro.
Prome cu Fiesta Rotaria ya caba por sigura bo carchi pa e rifa cu ta tuma luga na final di e dia y tin como prome premio, nada menos cu un auto KIA Seltos 2025 completamente nobo, ademas di diesocho otro premio mas. E cantidad di premio mas grandi te cu awo, ta inclui pasashi pa Hulanda, telefon celular, weekend stay na hotel, diferente gift certificates y cash.
Cumpra bo ticket na diferente punto di benta rond di e isla, for di Noord te San Nicolas. Check esun mas cerca di bo bishitando e pagina di Facebook: Fiesta Rotaria by Rotary Club of Aruba. Tambe lo tin miembronan di e club bendiendo riba e ruta di Carnaval e fin di siman aki. Cada ticket tin un balor di 25 florin y e sorteo lo ta e mesun diadomingo 30 di maart na Fiesta Rotaria den presencia di notario.
Fiesta Rotaria ta bon conoci pa ofrece hopi producto di bon calidad, sea nobo of segunda mano na bon prijs; for di mueble y material te na aparato di cas y comestibel. Fuera di esey tin tambe su kids corner caminda muchanan lo ta feliz y bon entreteni, mientras cu adultonan ta disfruta di e ambiente di musica, presentacionnan en bibo y mas.
Porta di Fiesta Rotaria ta habri pa exactamente 9’or di mainta y lo core te cu 5’or di atardi. Un y tur ta bon bini pa bin probecha di tur oportunidad y pasa un dia dushi. Rotary Club of Aruba ta duna un danki grandi na tur patrocinado den comercio, miembro y boluntario cu ta haci Fiesta Rotaria posibel.
Tocante Rotary Club of Aruba:
Rotary Club of Aruba ta un asociacion cu desde 1938 ta afilia na Rotary International. E ta consisti di lidernan comercial y profesional cu ta duna di nan mes na servicio humanitario. E ta promove e reglanan mas halto di etica den tur ocupacion y ta contribui na e desaroyo di bon boluntad y pas rond mundo. E tin aproximadamente 1.4 miyon miembro boluntario trahando den mas di 46 mil club na mas di 200 pais y teritorio.
Pa mas informacion, tuma contacto cu Shelby Maduro na 593-3185.
