Di 10 di maart te cu 11 di april 2025, Dienst Uitvoering Onderwijs (DUO) ta haci un bishita di trabou na e area Caribense. Durante e bishita lo habri oficinanan di servicio temporal. Tambe DUO ta organisa encuentronan di informacion tocante financiamento di estudio. Durante esakinan ta duna atencion tambe na con studiantenan, cu e number di servicio di ciudadano (burgerservicenummer (BSN)) cu nan a ricibi, por prepara nan mes mas miho riba nan estudio na Hulanda.
Ora studiantenan pidi financiamento di estudio, nan ta ricibi automaticamente un BSN tambe, entrante 1 di april 2024. Cu esaki, prome cu nan biaha pa Hulanda, studiantenan por cuminsa regla un DigiD, cu cua nan por drenta den websitenan di gobierno Hulandes. Asina studiantenan por cuminsa tira bista entre otro riba haltura di nan financiamento di estudio. Tambe nan por cuminsa traha afspraak den algun municipio pa inscripcion den e municipio caminda nan ta bay biba. Ademas ta posibel tambe pa habri un cuenta di banco online serca algun banco. ‘Nos a ripara cu desde cu studiantenan Caribense ta ricibiendo un BSN, nan ta biniendo Hulanda miho prepara’, segun Monique Hoogerwerf, coordinador di area Caribense na DUO. ‘Ta dushi pa mira cu pa e motibo aki nan por cuminsa mas miho.’
Encuentronan di informacion
DUO, di 10 di maart te cu 11 di april, ta presente atrobe riba tur e islanan Caribense – Saba, Sint Eustatius, Sint Maarten, Aruba, Corsou y Boneiro – pa duna informacion tocante studiamento na Hulanda. Banda di informacion tocante financiamento di estudio y BSN, futuro studiantenan y nan mayornan ta tende tambe tur cos tocante asuntonan practico cu nan mester regla.
Oficinanan di servicio temporal
Ademas DUO ta habri oficinanan di servicio temporal riba cada un di e islanan aki, caminda studiantenan por acudi cu pregunta tocante nan financiamento di estudio of otro asunto relaciona cu estudio. Ex studiantenan tambe por haya informacion aki tocante pagamento bek di nan debe di estudio.
Un oficina di servicio pa un aña largo na Corsou
Pa Corsou tin algo otro plania; E primavera aki DUO ta habri aya un oficina di servicio pa un periodo di prueba di un aña. E oficina aki ta brinda sosten extra na futuro studiantenan y personanan cu un debe di estudio, pa por brinda nan servicio personalisa durante henter aña. E colaboradornan ademas ta bay duna informacion na scolnan tambe.
Mas informacion tocante e encuentronan di informacion y e oficinanan di servicio temporal por haya riba duo.nl/bezoekcariben.
