CAFT, Fraccion MEP y RMR tambe ta urgi pa Presupuesto 2025 wordo trata
Gobernacion ta algo serio y e Ley di Presupuesto ta e ley di mas importante cu Parlamento ta trata pa asina gobernacion por tuma luga. Aunke cu e Ley di Presupuesto 2025 y tur informacion relevante ta na Parlamento caba, toch Presidente di Parlamento ta tarda pa trata Presupuesto 2025.
Tardansa ta kibra disciplina presupuestario
Desde aña 2022 Minister Maduro di Finansa a bin ta entrega e Ley di Presupuesto na tempo na Parlamento pa aprobacion di e fondonan cu ta haci e maneho y trabounan posibel pa e siguiente aña di gobernacion. Di e manera aki Presupuestonan 2023, 2024 y 2025 a wordo entrega na tempo na Parlamento pa nan tratamento. Lamentablemente nos por mira cu debi na eleccion y tardansa den formacion di un Gobierno nobo, e disciplina presupuestario ta bay perdi, ya cu Presidente di Parlamento no tin fin di yama e reunion pa trata Presupuesto 2025.
TUR instancia ta urgi pa trata Presupuesto 2025 pa caba
No ta Minister Maduro di Finansa so ta haci apelacion na Presidente di Parlamento pa trata Presupuesto 2025, e organo di supervision financiero CAFT, Fraccion di MEP y Conseho di Minister di Reino RMR, TUR ta urgi Presidente di Parlamento pa yama reunion pa trata Presupuesto 2025 pa asina gobernacion por continua na un manera ordena unda procesonan financiero, maneho di debe, inversion y destaho por sigui normal.
Presupuesto ta ‘beleidsarm’ pa acomoda cambio den Gobierno
Minister Maduro a splika cu ta bisto cu e Gobierno nobo lo kier haci cambio den e Presupuesto 2025. Esaki no mester ta problema, ya cu una bes aproba, ora e Gobierno nobo sinta, nan por presenta un Cambio di Presupuesto y inclui e maneho nobo den e presupuesto. Mas aun, cu bista riba eleccion Presupuesto 2025 a wordo traha ‘beleidsarm’ pa asina por fit e cambio den maneho di e Gobierno nobo sin mucho problema.
