ORANJESTAD – Durante conferencia di prensa di Gobierno di Aruba, Prome Minister Evelyn Wever-Croes hunto cu DOW, a elabora riba e topico di infrastructura y Aruba su careteranan. Prome Minister a indica cu lamentablemente debi na e pandemia na 2020, tur fondo cu tabata tin aloca pa mantencion y asfalta e careteranan mester a wordo realoca pa salba bida di hende y pa atende cu e retonan cu e pandemia y e crisis economico a trece cune.
Danki na e bon maneho financiero di Gabinete Wever-Croes II, DOW awe tin un fondo acumula te cu aña 2024 di 18 miyon florin pa por ehecuta e plannan cu tabata tin caba te cu 2024. Aparte di esaki den e proyeccionnan financiero multi anual, Gobierno a tene cuenta cu tur aña por aloca por lo menos 18 miyon florin pa por sigui inverti den e careteranan di Aruba.
Cu e placa cu tin destina pa 2025, ya caba por logra haci hopi, pero mirando con hopi trabou tin, lo dura añas pa por keda cla. Sinembargo Gabinete Wever-Croes a pone e fundeshi y cu esaki DOW lo por cuminsa cu e trabounan pa cu e careteranan di Aruba.
