Aruba Tourism Authority (A.T.A.) a honra Massive Brass Band pa nan contribucion na e tradicion musical di Aruba, cu ta Asambeho. Funda na 2015, y bou guia di Roderich Lopez, Massive Brass Band ta ser considera como un gran parti di e historia musical di Asambeho na Aruba, cu presencia constante den festivalnan local, paradanan den Carnaval di Aruba, Island Festival na San Nicolas y mas. Ta di menciona cu e aña aki ta bira e prome biaha cu Massive Brass Band tin e honor di habri paradanan di carnaval. Alabes, A.T.A. ta reconoce creadornan di e musica moderno y cu ritmo autentico di Asambeho na 1960, esta Arnold Beide, Alfonso ‘Bulto’ Gibs, y Samuel Hodge. Alabes, A.T.A. ta duna realse na tur cu a sigui cu e tradicion, esta Excelsior Brass Band, YMCA Brassband, Brass Explosion, San Fernando Brothers, Savaneta Brass, The Blue Diamond Brass, Daimari Brass, Good Guys, Academy Brass Intl, Gramling Brass, Jamming Brass, Shiribana Brass Band, Hotel All Stars, Rufo All Stars, Royal Stars, Hell’s Angels, Born Losers, The Out Laws, Kids of Fame, DuziDuzi Brass, Little Devil, Dynamic Brass, Energy Brass, Savage Brass, MoonDogs, D2U-365, and Quality Brassband, Aruba Angels Brass Band, Bad Boys Brass Band, y mas.
Aunke cu Asambeho tabata considera como un musica dominante, cu tempo a encontra cu diferente desafio debi na introduccion di musica amplifica, electronico, y cambio di tendencia. Cual ta haci cu mas ainda a bira un motibo adicional pa preserva y rebiba esaki.
Cu determinacion y exposicion riba panorama local, Massive Brand Band a percura pa continua cu e Asambeho riba plataforma internacional cu presentacion na diferente eventonan grandi manera Ahoy Rotterdam Arena, durante marathon di Nijmegen, y Zomer Carnaval na Rotterdam. Mas ainda cu presentacion na Magic Kingdom na Orlando Florida, y mas recien na Gasparilla Parade na Tampa Florida. Cual ta haci cu awe nan ta carga e nomber di Massive Brass Band International.
A.T.A. ta felicita y gradici Massive Brass Band pa nan esfuerso pa preserva y engrandece e cultura autentico di Aruba.
