Carta di CAft na Parlamento di Aruba pa trata Presupuesto 2025 a yega Hulanda
ORANJESTAD – Diabierna 21 di februari, durante e Conferencia di Prensa di Gobierno di Aruba, Prome Minister Evelyn Wever-Croes a informa riba dos decision importante cu a wordo tuma durante Conseho di Minister di Reino. Ta trata di e revocacion di ley di RAft y e deadline cu Rijksministerrraad a pone pa Aruba trata Presupuesto 2025.
Presupuesto 2025 ta na Parlamento
Ley di Aruba ta stipula cu 15 di December di e aña prome, e presupuesto di e aña siguiente mester ta estableci. Si esaki no ta e caso, por lo menos mester tin un indicacion riba un otro fecha. Den e caso di Presupuesto 2025, esaki ta na Parlamento caba, hunto cu tur documentacion necesario, incluyendo un nota di cambio, en espera pa Parlamento fiha un fecha pa e wordo trata.
CAft a manda carta pa Rijksministerraad
Manera ta conoci, CAft (College Aruba financieel toezicht) a manda un carta di aviso pa Parlamento y Gobierno pa pidi atencion pa trata Presupuesto 2025 mas pronto posibel. Como CAft no a haya contesta di parti di Parlamento, nan a escala esaki na Rijksministerraad (Conseho di Minister di Reino) y awe e carta di CAft tawata riba agenda pa wordo trata. Aki Rijksministerraad a duna instruccion na Aruba pa percura pa trata Presupuesto 2025 prome cu 31 di maart.
Gabinete Wever-Croes 2 a cumpli cu su responsabilidad
Minister Plenipotenciario señor Ady Thijsen na su turno a splica Rijksministerraad cu Gobierno di Aruba a haci tur di su parti y a entrega e presupuesto, a manda tur informacion na Parlamento y a contesta tur pregunta y lo sigui haci tur esfuerso pa e presupuesto wordo trata. Aki Rijksministerraad a indica cu nan lo manda un carta cu cual Gobierno di Aruba lo bolbe urgi Parlamento pa trata e presupuesto.
Presupuesto 2025 no ta stroba e Gobierno nobo
Prome Minister ta indica cu Presupuesto 2025, no ta un presupuesto cu lo stroba e Gobierno nobo. Pasobra den e maneho financiero a tene cuenta caba cu lo ta un aña pa un gobierno nobo bay fiha, debi na eleccion na december. E presupuesto tin lo basico cu e gobierno mester pa sigui funciona y sigui duna e servicio basico y si e presupuesto no pasa, ta pone full e operacion di Gobierno den peliger. Pa awor lo por uza solamente un parti di e presupuesto, pero e ta limita na 1/4 di e presupuesto di 2024. Unabes cu bin un gobierno nobo na maart, nan por cuminsa traha riba nan “Nota di Cambio” y bin cu e presupuesto supletorio. Haciendo esey lo no tin problema cu Hulanda, cu Rijksministerraad, ni un escalacion cu por yega hasta atrobe na un KB, un Curatela Financiero. Den e caso aki, lo no ta un KB pa Gobierno di Gabinete Wever-Croes 2, cu a cumpli cu entrega e presupuesto, sino pa e gobierno nobo.
Prome Minister:
“Di akinan un apelacion na e partidonan den formacion, partido AVP y FUTURO, pa atende cu e stuacion aki na un manera serio y debido pa Aruba no hay’e un biaha mas den e problema di escalacion cu Rijksministerraad. Algo cu mi a siña den 7 aña den relacion den Reino ta cu confiansa ta e cos di mas importante. Haci loke bo ta bisa y bisa loke bo ta haci. Si bo drenta gobierno den un situacion di desconfiansa pasobra bo tawata terco y no kier a pasa e presupuesto, bo ta cuminsa den desbentaha y lo tarda bo tempo pa haya e bentaha. Ami a pasa aden na 2017, ora mi a drenta Gobierno cu un desbentaha grandi y apesar cu tawata un otro gobierno, otro asignatura, otro persona y hasta otro genero, pa Hulanda e tawata e Gobierno di Aruba, e Gobierno di Mike Eman cu a redobla e debe y bay den welga di hamber. Esey Hulanda tawata tira na mi cara constantemente.
Awor Gabinete Wever-Croes a crea un base di confiansa y por a wak esaki den un carta cu Secretario di Estado a manda pa Parlamento Hulandes den cua e ta indica di tin tur confiansa cu Aruba lo logra su metanan financiero. E Gobierno nobo lo cuminsa cu un base di confiansa cu ami a traha pa nan, cu ami no tawatin ora mi a cuminsa, no bent’e afo zomaar, paso ta e pueblo di Aruba lo bay paga pa esaki despues”.
