ELMAR: Atencion na Transportadonan di Truck di Carnaval pa Mantene Seguridad Electrico

Oranjestad – 21 februari 2025 – ELMAR ta pidi atencion di tur transportadonan y chauffeurnan di trucknan di carnaval pa mantene seguridad electrico di liñanan aereo durante e temporada di carnaval. E infrastructura di liñanan aereo ta inclui liñanan di cable (isola y no isola) y liñanan di coriente. Esaki ta un peticion importante pa preveni interupcion di coriente y peliger pa bida di hende.
Vibra di carnaval ta halto, pero seguridad di nos tur ta principal. Nos ta recorda:
● No instala obheto riba e truck di carnaval cu por alcansa of toca liñanan aereo di coriente.
● Structuranan halto, decoracionnan of ekiponan adicional por toca e liñanan aereo di coriente y crea situacionnan peligroso.
● Sigura cu ningun persona ta para riba e dak di e truck di carnaval of un nivel halto cu por trece peliger cu liñanan aereo di coriente, esaki por pone bida di hende na peliger.
Pa garantisa un carnaval sano pa tur hende, ta sumamente importante pa cumpli cu e regulacionnan di altura. Si tin necesidad di asistencia, por solicita acompañamento di ELMAR y escorte policial pa transportenan cu ta representa un riesgo pa liñanan aereo. Pa mas informacion, por tuma contacto cu ELMAR via 523-7100.
Laga nos celebra den bon energia, pero tambe cu seguridad!